U Symbood Montri Rangbah ka jylla, u Prestone Tynsong da ong u wa ya i rai wow pynkrehkaam ya ka Inner Line Permit ha ka jylla wa da chim rai ha ka yung dorbar dang man i iwa sahteiñ wei da kyntait u leh wow khana yei yaklam wa u montri ki kaam pohyung ka sorkar pyrdi, u Amit Shah ha Delhi.
Da ong u wa hanlada em ka khlam, ka sorkar jylla dang booddien ko ya ini i dawa khlem kheiñ ya ka khlam wow lai cha Delhi wow yaklam hajrong ini i kaam wei wa ha u bnai wow wan ye wow lai biang cha Delhi neibynta ini i jooh i kaam.
Da kyntait u wa ka sorkar da pyndur ko wow pynslem yeini deiwa ong wa kani ka kaam ym chong ko du ha ka sorkar jylla wa lada toh du haka sorkar jylla da ye wow pynkrehkaam nadooh rap nachwa wei emkaam wow pynsñiawthooh wow pynche chooh chooh ya ka sorkar India.
Heiyatoh wa i wym e ya ka ILP ha Meghalaya neidaw wa man ko ka jylla wa man luti ya kiwi tawon ki jylla, u Prestone da ong u wa ym em i eh hajrong ini neibhah em ki rukom pynkrehkaam ya ka.
Heiyatoh wa ka Meghalaya Residents Safety and Security Act, wa da pynuiñ u Lat ryngkat ki yumut, u Symbood Montri Rangbah da ong u wa ya ini i kaam ka Political Department dang bichaar ko wei daw phah biang ko cha u Lat ka jylla, wei lada emkaam daw wanrah biang ya ka ha ka Dhab ki Montri (Cabinet).
Hawa kylli wa lada ym yoh ya ka ILP, wei lada waroh ki 60 ngut ki MLA smat ki wow lai cha Delhi wow yakhih dawa yeini, neiliang u Prestone da ong u wa katkam wa man katni, ha Delhi da joor bha i ku kiwa yoh COVID-19 wei ym man iwa chngaaiñ wow yakhih kam ha ini i por.
