Jowai : Dei kyr-iaw ki chi ch-oh chi ch-oh ki khynnah na ki 6 skur ka chnong Nangbah da pynkynmoo ki yei emkaam u man kiwa leh khooid samen pa samen, ha chnong kamjooh leh ha i baam i dih yow lait u yoh kjut pynhiar prai (Diarrhea) iwa man kam chi bynta wow pynduna yeini i kjut lyngba ka scheme Intensified Diarrhea Control Fortnight (IDCF) kawa da sdang nadooh ka 11 tarik ha chnong Wahiajier.
Ynne ka sngi ha Nangbah ki khynnah skur wa kynthup ya ki skur Albin Lamare Memorial Secondary School, ka 12 Kur Kyndong Syiem, ka Susng B UPS wa kiwi kiwi da lai paidbah ki nadooh ka Nangbah PHC hadooh ka yung skur Iawmusiang Govt. LP School Nangbah heiwa da pynman ya ka yalang yow pynsñiawthooh ya kiwa emlang yei emkaam u leh yow yada na i kjut Diarrhea.
Ka Dr. C.Q. Bamon, Ayurvedic Physician RBSK, Thadlaskein Block wa ka kong P. Thubru, Lady Health Visitor da batai bniah ki yei emkaam u man i kiwa lehkhooid nadooh i sait kti chwa u baam, u chet ya ki umdih, yow pynemkaam ya ki paikhana u pynkhooid ya ki dooid yow yada ym du na i kjut Diarrhea kamjooh leh ki kjut Malaria, Japanese Encephalitis kiwa mih du nei leh tngit ki bru.
Hei yatoh won wow sumaar ha yung (Home Remedy) lada em wa sooh kpoh, Pynhiar, wa syuiñ khlieh ye u pynkhreh pyn ha yung deiwa khleh ya ka um 1 liter wa dadep chet deiwa khleh kamwa chiteiñ siang i blooh wa 6 siang i chini.
Lada pynemkaam won ya ki ORS wa thied na dukan toh u theh lut waroh na wa song ha um wa 1 litre wei dih pynlut ka. Ymhoi u pynemkaam u ORS du chiteiñ neibhah yap i bor u lada ym pynemkaam du chisien hadien wa da wai ya oo.
Da pynkut ya ka yalang deiwa saam cha kiwa jop ha ka yakop dro heiwa da yoh nyngkong da u Daplangki Pasi wa ar u Samha-Oo Padit wa le u Newman Padit.
Da jied leh ya ki ar ngut kiwa jop ha ka yakop Slogan Writing.
Ya kam kani hi ka jooh hi ka lai paidbah da dep pynman ha Nartiang, Laskeiñ wa ha Amlarem wei wa kani ha Nangbah toh kawa khaddooh hei yatoh wa ka IDCF hapoh West Jaiñtia Hills wei da pynman ya ka dei ya kreh lang ka NRHM wa ka RBSK.
Read Also : Ka e dawai wa ar tayaw yow pynduna yei pynhiar kpoh ki khynnah
Discussion about this post