Shillong: U Montri Rangbah ka jylla, u Conrad K Sangma da pyntip u wa u Lat ka jylla, u Satya Pal Malik daw lai u cha Delhi hadien ka 17 tarik uni u bnai wow yaklam wa u Home Minister ka ri India neibynta wow pynkrehkaam noh ya ka ILP ha ka jylla Meghalaya. Da ong u wa ka sorkar dang yang chwa ko wow lai yachem wa kiwa yahkhmat ka sorkar India hajrong ka ILP, tangwa i yaklam wa ka sorkar India dang lai i hadooh katni.
U Montri Rangbah ynne ka sngi da yachem u wa u Lat ka jylla wow yaklam hajrong i pynkrehkaam ya ka Inner Line Permit ha ka jylla wei kamjooh wow e muhor noh ya ka Meghalaya Resident Safety and Security Amendment Bill. Da pyntip u wa neiliang u Lat da kular u wow chimkhia nei kyrdan yong oo hajrong i angnood ki paidbah ka jylla yow yoh ya ka ILP.
Hawa yatoh wa ka MRSSA, u Conrad da pyntip u wa u Lat da dep u wow puræ ya katai ka Bill, wei da pyntip u wa ya kani ka Bill dang hap wow yaklam biang wei ka sorkar pyrdi neidaw wa da em da kiwi ki pynsñiaw rap nachwa, da pynman wa ym ye wow e muhor wei pynrap u wa neiliang u Lat da kular u wow pynsñiawthooh ya ka sorkar India hajrong ka MRSSA.
Ha i jooh i por, u Conrad da pyntip u wa ya khyrdop (Entry/Exit) ha Umling, Ri-Bhoi District daw wai noh ha ka 16 tarik uni u bnai chwa wow wai yaki thaw uiñke suwari neibynta ki bru wa na baar jylla, da pyntip u leh wa i wan yong ki lieñsuiñ na Delhi cha Shillong daw sdang nadooh ka 21 tarik uni u bnai.
