Jowai: Ka sngi wow sah kynmoo sah khanatang ya ki khon ka chnong Jowai wa ha kani ka sngi Pynsin 12 tarik Kmaichonglad 2020, ka Synjuk ki Waheh Chnong Jowai da yoh ko u pynlait paidbah ya ka riti krehkaam ka seiñ hapyrdi i sakhilang ki waheh wasian wa da mihkhmat na ki dong ki chnong waphær waphær.
U Alan Niangti, President ka seiñ chwa wow yoh i pynlait paidbah ya ka riti krehkaam da u kongsan Wh. S. Quotient Sumer, da e u ki kyntien yahkhmat katwa u Secretary ka seiñ u Wh. L.D. Lakiang chim u ka bynta wow khana pynsñiaw yei parom wa tbian i lai luti ka seiñ nadooh u snem 2011.
U Wh. S. Quotient Sumer hei e kyntien kam u kongsan da ong u ini toh i burom iwa ka Synjuk da leh ko wei chooh chooh leh e mynsien u ya ka Synjuk kamjooh ya ki dkhot yong ka waroh deiwa ong e wa i burom ka chnong Jowai u hær u bna i da ki kaam wa bha yong kani ka Synjuk wei ki wow man leh ka nongmuna ya kiwi, neitæ kitbok kitrwiang u leh wa ka chnong ka thaw u kap u lai ko chakhmat deilang i chongsuk chongsaiñ, i man miat man bha, i burom akor wei roi i paar ha waroh ki liang.
