Jowai: Ka 11th District Badminton Championship wada pynman da ka West Jaiñtia District Badminton Association wei kawa da sdang nadooh ka sngi Muchai 7 tarik Kmaichonglad, ha kani ka sngi Pynsiñ 12 tarik Kmaichonglad da poi ko cha wakut dei wan sakhilang u B.D. Marak, Superitendent of Police West Jaiñtia Hills District kam u kongsan hei emlang u J.M. Pohsngap, President WJDBA, u EMH Passah, Working President WJDSA, u Mewothi Nongpluh, Secretary WJDBA wa kiwi kiwi kiwa chah khut sñiawbha.
Ya kani ka yakob da pynman ha Seiñraij Indoor Sports Hall wa em ha dong Tpep-Pale heiwa ki bru wa ka-it ya kani ka jait yakob nadooh ki khynroo khyllood hadooh ki waheh, da wan ki wow yachimbynta u pynyoo pyntaw jar jiar i sap wei buit i bor yong ki.
Da sakhi ya ki kyrdan yakob waphær kiwa da pynman ha kani ka janmiet, da yoo sakhiat wa kiwa ya chimbynta wa poi cha ka thong wow yaknieh yei naam ha uni u snem yaleh dohyap dohim ki wow sai u pynyoo pyntaw jar jiar i sap wei buit i bor yong ki hapyrdi kiwa boon ki paidbah wei iwa da pynchoh pynchongchit yei man i sñiaw yong ki lok ki jor wa wan sakhi ya kani ka yakob.
Ha ka yalang pynkut yong kani ka janmiet hei pynlai u Rimilan Passah, Chairman Tournament Committee WJDBA da em leh i pynkup burom wa kyrpang ya u Sunday Morning Tariang wa man uwi na ki waheh ka Ri-loom Jaiñtia wa im sngi u pynwyrngia ha ki wa boon ki kaam yalehke Sports wei neibynta kini kiyi kiyi ki kaam wa bha yong O kiwa man ka nongmuna leh ya kiwi. Ka sorkar dang ha ka 11 tarik u Kmaichonglad da pynkup burom ko ya o da ka Chief Minister’s Sports Person of the Month Award.
Kiwa ya chimbynta kiwa da rah yei naam jop yong kani ka yakob ha uni u snem toh man ki kamni- ha ka Mixed Double u Hrisami Passah wa ka Bhalang Passah da rah ki yei naam jop deiwa pynrem ya u Mebanker Shullai wa ka Balashembha Passah.
Ha ka Women’s Single- Ka Wandakihi Passah da jop ko ya ka Josephina Passah katwa ha ka Men’s Single u Mebanker Shullai dajop u yow Hrisami Passah.
Kyruiñ won ha ka Men’s Single 35+ u Dr. Peterson L. Lamare da pynrem u yow Dauru Laloo katwa ha ka Men’s Double u Dauru Laloo wow Rimilan Passah dajop ki yow Arkiyo Passah wa u Damehi Kyndiah.
Ha ka 50+ Men’s Double u Teddy Laloo wow Salan Paswet da jop ki yow Dawanroi Pyrbot wa u Kiroi S. Bareh katwa ha ka yakob yong samen, u Shibun Pohleng da pynrem u yow Sunday Tariang.
Kdar wan i ha ka Men’s Double- U Rimilan Passah wa u Mebanker Shullai da rah ki yei naam jop deiwa pynrem yow Dauru Laloo wa u Deilang Nongpluh katwa ha ka Women’s Double won, ka Ribhalang Passah wa ka Wandakihi Passah da rah ki yei naam jop deiwa pynrem ya ka Balashembha Passah wa ka Emilanadara Chyrmang.
