Jowai: Ha ka yalang pyrchah CAA wei dawa pynkrehkaam ILP haka jylla Meghalaya wa pynman ynne ka sngi ha Jowai da ki seiñbhalang wa kynthup yaka FKJGP, HNYF, KSU wa ka JSU. U Shiningstar Kharbihkhiew Asst. Education Secretary Central Body KSU da ong u wa i daw wa pynman ya ki wow dawa ILP toh neidaw wa ka jylla da chah ktah lut ha ki liang waroh.
“I dawa ILP i kiwa mih madam, i pyntikna i wa ka yung ka sem yong i leh ki dawa ki yaka ILP, nga klam O ya ini toh neidaw wa dang ini wa dep da em ka yatai ñia hapoh North East News wa ong wa ha Meghalaya du ki seiñbhalang wa dawa ILP, tangwa ym em man kamtæ neibhah wa i waroh em ki ya kiwa ha yung ha sem,” ong u Kharbihkhiew.
Da ong u leh wa i dawa ILP yong ki ym em mut wow pynkut noh ya ki myntoi wa i yoh i haka jylla, tangwa mut neibynta wow kdoh u khoom yei wan psiah kulmar ki bru wa na baar, heiwa ka ILP mut ko wa uwon uwon wa psiah chapoh ka jylla hap wow tip i.
Neiliang u Trebor Suchen, General Secretary JSU da ong u wa man iwa sñiawsih wa i boon bru nang ku ko haka jylla wei ha u snem 2019 da poi cha ka 34 lak ngut, tangwa ki jaitbru yong i duna bha ki heiwa da em du 14 lak ngut i boon kam ki tre chnong, kamtæ da kylli u wa kitæ kiwa tam toh ki yi kiwa pyndap 34 lak haka jylla.
Hajrong ini da ong u wa lada phi ki paidbah ym sñiaw yahap mo wow dawa ya kani ka aiñ wa em lamieñ næ ka ILP, da pynrap u.
Chooh chooh da ong u wa ym myntoi yaki 60 ngut wow chong ha Assembly du wow wanrah yaka roi ka paar lada ym yoh i wow ksoh yaka kaam synchaar haka ri ka jylla.
“I im i du chisien, katwa ka pateiñ ka mynried dang boon, na itæ i daw ym toh wow pynsepai yaka rta wa katni, wei u dohyap khnang yow im suk mynstep mankawi manda i ym em de i ha pyrthai,” ong u Suchen.
“Katwa i dang paan i yaka ILP, ka sorkar da e pathan ko daka CAA, ki seiñbhalang hapoh kawi ka chatri haka 19 tarik u Kmaichonglad 2019 da pynbor ko yaki 60 ngut ki MLA wow wanrah yaka rai wow pynsñiaw cha ka sorkar bei wa i emkaam i yaka ILP, tangwa i sñiawsih i neibhah ym tip kammon ka sorkar bei ka kheiñ ko yaka jylla yong i, katwa yaka Mizoram won hadien wa da rai hapoh Assembly, ka sorkar India da e ko yaka ILP,” ong u Ohibait Dkhar, President KSU Jaiñtia Hills hawa e yei klam.
Kamtæ da khut u yaki paidbah wa jooh ya kyrchaan wow ya mih paidbah lang yow pynsñiaw ya iwi i sur khang wa kiwa mihkmat wa ka sorkar bei u chah ki yei chkoor ya i ood yong ka jylla.
Kiwi de kiwa klam kynthup ko ya u Damechwa Syrti, HNYF, D.S. War Chief Organising Secretary Jaiñtia Zone ka FKJGP, u Forwardman Nongrem President KSU South West Khasi Hills wa kiwi haka yalang wa pynlai da u Lening Tariang, Organising Secretary ka KSU Jaiñtia Hills.
Hadien ini da em leh i thang ya ki dur bula u Narendra Modi wa u Amit Shah kam i dak wow beiñ joor yaka sorkar NDA kamjooh i pyrchah joor yaka CAA.
