Ka seiñ All Jaiñtia Poultry Traders Association (AJPTA) deiwa ya krehlang wa ki seiñbhalang wa kynthup yaka HYC, JSM, HNYF da rai ki wow kynreh naphang ya ki kari ki baar jylla kiwa wan dai syiar chapoh u pood u ang yong ka Ri-Loom Jaiñtia Hill ki wym lai katkam ki kyndon yong ka aiñ.
Ya ini i kynreh kari da rai wa daw pynman ha iwon iwon i por ya ki kari kiwa psiah pyrchah aiñ wei leh kiwa thmu wow knieh noh ya ka kamai kajih yong ki tre jylla kamjooh leh ya kitu ki baar jylla kiwa wan wow dai Wholesale da idæ hi.
Heijooh i por da ong leh wa ym ye u len wa ki mar waroh kiwa wan wow pynlai yaw toh kiwa wan na baar wei da pynlai yaw won da ki bru yong i lane ki tre jylla tangwa iwa ktah won ya ki tre jylla wa kini ki baar jylla da dai Wholesale ki pyn da ki hi iwa mut wa da knieh noh ki ya i hok yong ki tre jylla.
Da ong leh wa lada ki baar jylla wan ki wow booh lane pynhaap ya ki mar cha ki bru ym ye wow leh iyi iyi tangwa ktah won ko lada wan ki wow pynlai yaw da ki hi.
Kamtæ ka seiñ da ong ko wa lada ym ye u yada ya i khih i khan katni, daw chah knieh yabor wei ka seiñ daw lai ko chakhmat la ha iwon iwon i por wow yada yaka jaitbru wa khian paaid, da ong ka khubor na u Kyrshan Rymbai, President AJPTA.
