U MDC ka 12 Barato Mukroh, u Aiborlang Shadap ynne ka sngi da ong u wa hanlada em i hapyrdi ka khlam kawa da khanglaad wow sakhi laitlooid ya ka Christmas tangwa neiliang yong oo da e khublei Christmas wa kyrpang wa u Snem Thymme ya waroh ki khon ka Constituency.
Da ong u wa lyngba kani ka lehniam wa chisien chisnem da ki paaid Kristan ka pyrthai waroh kawi kamjooh leh hapoh ka jylla, da kyrmen wa i ngooh i dem u man i kyrkhu ya waroh wow yoh ya i doh i pran iwa khlan wa i phooh i phieñ lyngba i roi i paar wa i suk mynsien hi waroh.
“To e wa kani ka lehkmen Christmas wa Snem Thymme u man ko kawa lai bait khlem iwon iwon i jia wa sñiawsih neibynta i suk i kmen ya ka ri wa ka jaitbru waroh kawi,” da ong u Aiborlang.
Da ong u leh wa dap u dei mynsien wa khian wow pynsñiaw wa na ini i kmenlang chirup daw ku chaphrang ha i tip bru tip Blai wei wow maya kamjooh leh wow burom iwi ya iwi.
