Shillong: U Prestone Tynsong da ong u wa lada ka Hynñiewtrep National Liberation Council (HNLC) ye ko wow pynsakhiat deilang wa ki kot ki sla hajrong i pynbaad, smat u wow hiar chuki noh kam u Symbood Montri Rangbah ka jylla.
Hawa klam ynne ka sngi da ong u wa ym toh iwa suk wow maham ya kiwi, wei ym tip u iyi i daw wa pynman ya ki wow maham, tangwa da ong u wa i em yong oo ha ka chuki toh iwa jied yong ki paidbah ka Pynursla wei kamwa da yoo biang da ki paidbah ka jylla u chong u ha ka chuki kam u Symbood Montri Rangbah, wei toh ka kamram yong oo wow chakri hok ya ka jylla hadooh ka sngi wa khaddooh.
Kam wow kdaw heini wa ka HNLC lyngba u General Secretary, u Saiñkupar Nongtraw, da maham ko wow thombor ya kiwa ha yung ha sem yong u Symbood Montri Rangbah, u Prestone Tynsong wa u Montri ka chnat kaam pohyung u Lahkmen Rymbui lada ka sorkar dang pteiñ ko wow kem ya ki khynroo deiwa pynbaad wa ki toh ki dkhot ka seiñ. Da pynbaad ko leh wa ki dkhot ka seiñ kiwa da wan pyndem, ki yoh bhah ki mar T. 1000 na kawi ka truck kit mooyong, katwa T. 5000 toh i yoh bhah cha u Montri Rangbah, Symbood Montri Rangbah wa u Montri Kaam Pohyung ka jylla.
Ha kawi won ka liang, u Prestone da ong u wa ka sorkar ka chimkhia ko hawa yatoh wa i yaklam yasuk wa ka HNLC, tangwa kani ka kaam ym toh kawa kut du wa ka sorkar jylla, wei man ko leh i bynta yong ka sorkar India neibhah i kheiñ yaka HNLC kawa man pyrchah yaka aiñ leh da leh da ka sorkar pyrdi.
