U Montri ka chnat Social Welfare u Kyrmen Shylla da ong wa ka hukum namo ka Notification wa yatoh wa i e ST Certificate kawa da pynmih haka 17-11-20, ym toh kawa da klam, kawa e bor ya kitu kiwa chim yei kur u pa wa daw ye ki wow yoh yaka ST Certificate.
Da ong u leh wa kam ka Social Welfare Department ym em bor ku wow leh ya ini tangwa neiliang yong ki da e ki du ka chithi wa toh u pynsmat wow e ST Certificate cha kitu kiwa toh hok u yoh. Deiwa pynrap wa ki ym ye ki wow ong wa lada kitu kiwa chim yei kur yong u pa ye ki wow yoh ST Certificate.
Chooh chooh da pynche u wa ym toh du kawi ka chnat kawa pait ya kani ka kaam heiwa ki Deputy Commissioner da e bor ya ki wow pyntikna ki wa ki kot ki sla toh kiwa biang. Lada ki kot ki sla toh kiwa biang, ki DC ye ki wow e ST Certificate katwa lada ym biang ye wow kyntait.
Kamtæ ka chithi naka Social Welfare Department ym em ong ko wa hadooh kitu kiwa pynemkaam yei pyrtuid yong u pa leh ye ki wow yoh yaka ST Certificate.
Heijooh i por wa da ong u wa ym ye wow ong iyi iyi leh tangwa hap hi wow ap yeiwa ong kiwa boon deiwa pynrap wa hap wow yada yeiwa emkaam ki tre chnong.
Da ban biang u deiwa ong wa ka Social Welfare Department ym em ong ko wa kitu kiwa chim yei kur u pa emhok ki wow yoh ST Certificate tangwa kiwa ye u yoh toh du kitu kiwa emhok wow yoh.
“Wow ong e ST Certificate cha kitu kiwa chim yei kur pa, ini ym toh i rai wa embor ka Department wow chim.”
Hawa kylli lada oo sñiaw u wa lada hoi u e ST Certificate ya kitu kiwa e kur cha u pa, da ong u wa hap wow ap kammon ong kiwa boon neibhah i kam yong oo toh wow chakri yaki paidbah.
