Jowai: Ka Northeast Sports Development Foundation (NESDF) chirup i yakrehlang wa ka Soccer 7 India Federation daw pynman ko ya ka lympung yalehke Football wa tip kam ka 7-A-Side State Championship Football Tournament ka wow sdang nadooh ka 19 tarik uni u bnai, heiwa ha West Jaiñtia Hills District daw pynman ya ka ha Kiang Nangbah Stadium, katwa ha East Jaiñtia Hills District nawon daw pynman ha Madan Rymbai Iawpynsiñ.
Hei yaklam wa u CEO ka NEDF, u A. Lyngdoh da khana u wa ka liang wa jop na East Jaiñtia daw yakhun ko pyrchah ya kawa jop na West Jaiñtia khnang wow mihkhmat ya ka jylla.
Ya kiwa rah yei naam jop ha kani ka yakhun Final u yoh ko ym du ya ka song poisa wa T. 30,000 tangwa daw yoh ko leh u mihkhmat ya ka jylla ha ka National Championship ka wow man ha Guwahati ha ki bnai wow wan katwa ka liang wa rem won u yoh ko ka song poisa wa T. 15,000.
Da pyntip u leh wa ya kani ka lympung da pynman ha ki jylla waphær waphær ka thaaiñ mihsngi ka ri ya kiwa da pynlai da ka NESDF wei neidaw wa dang duna ka muna poisa ha uni u snem da pynman chwa ki du ha ka jylla Assam, Meghalaya wa Nagaland.
Ka tarik khaddooh yong ka Registration ya kiwa chimbynta toh ha ka 17 tarik uni u bnai wei neidaw wa haap bood ya ki SOP yong ka sorkar kamtæ da chah du 10 ngut donhi kiwa yalehke (Players) wow chimbynta.
U Lyngdoh da ong u leh wa kamwa em ki i thrang wow pynku ya ki jait yalehke nadooh kiwa dang khian rta da em leh i thmu wow wai ya ka Centre of Excellence ha Ri-loom Jaiñtia kawa man kawa nyngkong dooh.
Kamtæ da khut u ya kiwon kiwon ki dhab namo ki Club wow chimbynta ki ha kani ka lympung wei ya ka yutip wa bniah ye u yoh deiwa phone ha u Number: 8837035740.
