Shillong: Uwa yahkhmat ka Bharatiya Janata Party (BJP) uwa man leh u Montri ha ka sorkar MDA, u Alexander Laloo Hek, da ong u wa ka BJP ka booh ko hakhmat wow yakhun pyrchah ya ki kaam baam-tooh kamwa da chim rai kyrpang da ka BJP Meghalaya ha u Kmaichonglad (Dec) ynnin u snem.
Hawa klam ynne ka sngi, u Hek da ong u wa i pyndooh jait ya i baam-tooh toh iwa hakhmat dooh yong ka BJP, la ha ka sorkar næ cha baar ka sorkar deiwa hakhmat i myntoi neibynta ki paidbah.
Hawa yatoh wa i pteiñ yong ka BJP wow rah ya ka baam-tooh pyrchah ya ka sorkar MDA, wot hadien wa da rai ha ka Co-ordination Committee wow rah yatai chwa ha ka MDA, neiliang u Hek da ong u wa ymtoh waroh ki phang wow rah ha ka Co-ordination Committee.
Da ong u wa ka BJP ka pdiang ko ya waroh ki rai ha ka MDA Co-ordination Committee, tangwa ym mut wow suki hi-eh neidaw wa ka BJP ka emlang ko ha ka sorkar, deiwa ong wa ym ye wow khang ya kiwon kiwon ki Party lada ym sñiaw yahap ya iwon iwon, wei ka sorkar ye ko wow leh ya iyi wa toh u leh ya iwa emkaam kamjooh ki seiñ saiñpyrthai tangwa ym toh wow ktah won ya ka sorkar kawa yakrehlang.
Hawa kylli chooh chooh da ong u wa lada em iwon iwon i pynbaad pyrchah ya ka sorkar toh wow emlang wa ki sakhi kiwa biang.