Ka Sorkar Meghalaya daw yachem ko ya u Montri Kaam Pohyung ka ri India, u Amit Shah ha Shillong wow yaklam ya ki phang wa emkaam jhan ha ka jylla. Ynne ka sngi ki Montri yong ka sorkar Meghalaya Democratic Alliance (MDA) da yachem jhan ki yow pynbait ya ki kaam wei wow paan por leh wow yachem wa u Amit Shah.
Hawa klam wa ki laad pathai khubor hadien ka yalang, u Symbood Montri Rangbah ka jylla, u Prestone Tynsong da pyntip u wa ka sorkar da paan por ko wow yachem ya u Amit Shah wow yaklam ha Shillong ya ki phang wa kynthup ya ka Resolution wa da mynjur da ka yung dorbar chna aiñ ka jylla hajrong ka Inner Line Permit (ILP), i pynpsiah ya i ktien Khasi wa Garo ha ka Eight Schedule, i pynkylla ya ka Sixth Schedule wei i ya pynbait ya u pood u ang wa ka jylla Assam.
Hawa kylli, u Prestone da pyntip u wa ka sorkar da yoh ko ya i thoh na ki seiñbhalang kiwa kwah wow yachem ya u Amit Shah, wei neiliang ka sorkar ka dang leh ko ya iwa emkaam. Ha i jooh i por da pyntip u wa neiliang ka sorkar da phah ko yaka chnat pulit wow pynbiang ya waroh ki pahara ha ki bynta wa wan u Montri.
Katkam i pyntip u Prestone, u Amit Shah daw wanpoi u ha Shillong ha ka 23 tarik nadooh i por 10 waje i step wow embynta ka ha Plenary Meeting yong ka North Eastern Council, wei hadien kani ka yalang daw lai liwan noh u cha Guwahati, tangwa da pyntip u leh wa neiliang ka sorkar jylla daw pyrchang ko wow yachem ya u Amit Shah neibynta wow yaklam ya ki phang wa emkaam yong ka jylla.
