Ka 69th Plenary Session yong ka North Eastern Council (NEC) daw pynman ya ka ha Shillong, Meghalaya ha ka 23 wa 24 tarik uni u bnai hapoh i pynlai u montri ki kaam pohyung ka ri, u Amit Shah kam u chongknor.
Ha ka yalang daw emlang leh u MoS (Independent Charge), Ministry of development of North Eastern Region (DoNER) & Vice Chairman, u Dr. Jitender Singh wa ki dkhot ka NEC wa kynthup ya ki lat ki jylla wa ki montri rangbah ki 8 jylla ka thaaiñ mihsngi ka ri. Ki sahep na ki jylla wa ki chnat ka sorkar pyrdi leh daw emlang ki ha ka yalang.
U Dr. Jitender Singh ynne da khut yalang u ya ki sahep ka MDoNER wa NEC ha New Delhi wow booddien yei pynkhreh ya kani ka 69th Plenary Session ha Shillong.
Ha kani ka yalang wa ar sngi daw em i pynyoo (Presentation) na ka Ministry of DoNER, NEC, ki sorkar jylla wa ki chnat ka sorkar pyrdi heiyatoh wa ki kaam pynroi ha ka thaaiñ kamjooh leh ki kaam wa da toh wow leh neini chaphrang.
Daw booddien leh ya ki kreh ha ki kaam waphær waphær ha ka thaaiñ wow pynskem lada bood katkam ki kyndon kreh wa da toh u leh wei daw chim yutip leh ya i thmu wow leh hadien ka 31 Wisu (March) 2021 hapoh i por kreh ka Fifteenth Finance Commission.
