Ka Khasi Hills Autonomous District Council (KHADC) da pynkhreh ko wow yachem ya u Montri Kaam Pohyung ka ri India, u Amit Shah neibynta wow yaklam ya ki phang wa kynthup ya ka Inner Line Permit (ILP), ka Amendment ha ka Sixth Schedule wei kamjooh hajrong u pood u ang wa ka jylla Assam.
U Chief Executive Member ka KHADC, u Titosstarwell Chyne da pyntip u wa neiliang ka Council da phah ko da i thoh ynne ka sngi cha ka yung krehkaam u Chief Secretary ka jylla, yow yoh yachem wa u Montri ka sorkar India, wei da pynsñiaw u leh yei kyrmen wow yoh u yachem hanla ha ini i wan u Montri duna bha i por u.
Da ong u wa lada yoh wow yachem ya u Amit Shah, ki phang wa hakhmat dooh wow yaklam man ko hajrong ka rai yong ka yung dorbar ka Council wow kyrchan ya ka Resolution wa da mynjur da ka sorkar jylla wow kyntu ya ka sorkar India wow pynkrehkaam noh ya ka ILP ha ka jylla Meghalaya.
Kawi won ka phang wa ka KHADC kwah ko wow pynsñiaw hakhmat u Amit Shah toh hajrong i pynkylla yaka 6th Schedule kawa da sahteiñ hadooh katni, heiwa da ong u wa ka Parliamentary Standing Committee ym em pynpsiah ko yei e yumut ka KHADC, wei kawi won ka phang wa ka KHADC kwah ko wow pynsñiaw ha u Montri toh yow pynbait noh ya u pood u ang wa ka jylla Assam.
