Ynne ka sngi u montri ka chnat Information & Public Relations, u James K. Sangma da wai u ya ka Fixed Audio System ka chnat ha Tura, West Garo Hills District hei emlang u Ram Singh, Deputy Commissioner, West Garo Hills District; u B.S. Sohliya, Director of Information & Public Relations; u F.K. Marak, Assistant Director, Information & Public Relations wa kiwi kiwi.
U James hawa e yei klam da ong u wa ka khlam COVID-19 da yah ko hei wow kammon emkaam wow pachat ya ki yutip wa tne wei kawa paka wei i em ka Fixed Audio System daw pynjanai ko ya e yutip rap smat wei heipor wa biang cha ki paidbah heiyatoh wa ki rai wa ki kaam wa boon ka sorkar.
U James da yaroh u ya ki kaam ka chnat kawa da pynkrehkaam hok ya kani ka kaam wow e yutip cha ki paidbah ha i por wa biang deiwa ong leh wa ha u snem wa dadep heipor wa em ka Lockdown da mih chiboon ki khubor hamsaya iwa da wanrah yei kulmar wa i tieñsar hapyrdi ki paidbah.
Da pynsñiaw u leh yei kmen ya u montri rangbah ka jylla, u Conrad K Sangma uwa da pynlait poisa ya kani ka Project.
Neiliang u Ram Singh da ban joor u ya ka imlang sahlang wa emkaam wow man ki kiwa yakrehlang wa ka chnat wei wow kyrchaan ya ka sorkar deiwa sumaar wei wow pynneh ya ki tiar paidbah.
Neiliang u F.K. Marak hawa e yei klam e khublei, da ong u wa ym jooh em ki montri wow wan pait ya ka yung krehkaam ka DIPR ha Tura la 25 snem kattu wei deiwa em kini ki tanghæng wa thymme daw yarap i ya ka chnat wow yajan wa ki paidbah.
