U Montri Rangbah ka jylla Meghalaya u Conrad Sangma ynne ka sngi da lai wai paidbah u yaka yingkieñ Wahrew kawa da chna haka wah Wahreh wa em ha Tharia kawa pynyabi yaka chnong Sohbar waka Bhloaganj kawa haap ha Shella Constituency.
Kani ka yingkieñ toh kawa jrong 169.350 Meter wei da chna hei lut wa T. 49.395 klur wei man ko leh kawa jrong dooh hapoh ka ri ka jait yingkieñ wa da chna ha ini i rukom wa tip kam ka Road Arch Bridge. Ka poisa wa da chna toh napoh ka NLCPR.
Da emlang ha kani ka sngi u symbood montri rangbah u Prestone Tynsong, u chongknor ka dorbar chan aiñ u Metbah Lyngdoh, u MLA ka Shella Constituency u Balajied Synrem wa kiwi kiwi ki sahep sorkar.
U Conrad da ong u wa kani ka yingkieñ man ko leh kam ka dak e burom ya u MLA warim uwa jooh man leh kam u chongknor wa jylla u Dr. Donkupar Roy wa toh deiwa chikhia u da ye wow chna ya kani ka yingkieñ.
Ya kani ka yingkieñ da sdang u chna ha u snem 2014 wei da ye u pyndep ha u Kmaichonglad (Dec) 2018.
Kani ka thaw wa em kani ka yingkieñ toh kawa da pawnaam wa kiwa uiñke suwari.
U Conrad da ong u wa emkaam wow pynbiang yaki sarok wow poi cha kani ka yingkieñ wei ki kreh da sdang ki, da emkaam leh ki thaw baam, ki thaw sah ya kiwa wan uiñke suwari, ki paikhana wa kiwi kiwi kiwa emkaam neibynta kani ka kaam. Da pynrap u deiwa ong wa ka sorkar daw pyntikna ko wa waroh ini daw pynbiang, wei daw booh leh yaka bhah poisa wei da pynchlur u leh yaki bru samen wow wan ki chakhmat yow chimbynta.
