I thmu wow yaklam ya ka Inner Line Permit da ki kynhun seiñbhalang wei kamjooh ka kynhun ki Montri yong ka sorkar MDA wa u Montri Kaam Pohyung ka sorkar India, u Amit Shah da man ko kawa sepai ynne ka sngi heiwa neiliang u Shah ym em por wow yachem ya waroh ar ki kynhun heiwa da chim u du yaka dorkhat.
U Amit Shah da wanpoi u cha Shillong ynne ka sngi yow wai yaka yalang Plenary ka NEC heiwa da emlang leh wa kiwa boon ki kynhun kiwa da paan por wow yahcem neibynta wow yaklam ya ki phang wa emkaam ka jylla, khamtam hajrong ka Inner Line Permit, tangwa neidaw wa jhan u, ym em yoh wow yaklam iyi iyi leh.
Hadien wa ym em yoh yaklam wa u Montri, neiliang ki kynhun seiñbhalang ka jylla wa kynthup ya ka CoMSO, KSU, FKJGP, HNYF da pynsñiaw ki yei chrai wei hadien ini neiliang u Montri Rangbah ka jylla, u Conrad K Sangma da khut u ya ki seiñbhalang wow yaklam rap bniah.
U Lambokstarwell Marngar uwa man u President ka KSU da ong u wa i leh yong u Amit Shah ym toh wa kheiñpoh ya ki seiñbhalang næ ya ka sorkar, tangwa ya ka jylla waroh kawi. Da ong u wa kam ki seiñ ynne ka sngi da lai ki du wow paan ya ka rai, lada daw e u næ ym e yaka ILP, tangwa tang wow yaklam leh ym elaad ki.
Da ong u wa ini i leh da pynyoo wa ka sorkar India em ko iyi iyi cha kylla, tangwa kam ki seiñbhalang daw yakhun ki hajrong ka yurim wow pynkrehkaam yaka ILP ha kani ka jylla wei wow pteiñ yaka yakhih.
U Wellbirth Rani, President ka FKJGP da ong u wa ini i leh toh wym burom ya ki Montri ka sorkar jylla deiwa yaklam deiwa yieñ donhi, wei ka yachem ynne ka sngi ym man ko kawa hun neibhah da phah chondur wei phah mih wot kam ki khynnah.
