Hadien wa sepai i yachem wa u Montri Kaam Pohyung ka ri India, u Amit Shah iwa da wanrah yei sñiawsih wei chrai ya ki kynhun seiñbhalang, khamtam wa ha ini i wan cha Shillong u Shah ym em yoh por u wow yaklam yaki Montri ka sorkar jylla. U Montri Rangbah ka jylla, u Conrad K Sangma da ong u wa neidaw wa duna ware i por, u Montri ka sorkar India ym ye u wow yachem wa kani ka kynhun næ yaklam bniah hajrong kiwa boon ki phang ka jylla, tangwa da khut u ya waroh ki seiñbhalang wa ya ka sorkar MDA wow lai cha Delhi yow yaklam bniah.
Da pyntip wa ha kani ka yachem, neiliang ka sorkar da ye ko wow pynkohngooh deiwa kyrpaad ya u Shah wow pdiang du ya ki dorkhat ka jylla wei da pyntip u leh wa neiliang u Amit Shah da phah pyntip u wa thrang u wow yachem ya waroh ki kynhun nadooh ki Montri ka sorkar wei kamjooh ki seiñbhalang yow ap yeiwa emkaam waroh, heiwa da phah u wan cha Delhi ha u bnai wow wan yow yachem wei yaklam bniah hajrong ki dawa ka jylla.
Hawa kylli ya iwa ym sñiawsuk yong ki seiñbhalang hajrong i leh u Amit Shah, u Conrad da ong u wa neidaw wa pynkylla ya ka program ym em de yoh laad wow yaklam bniah. Hawa kylli chooh chooh, da ong wa la ka sorkar India em ko ne ym em yei thmu wow e ya ka ILP daw ye u yaklam bha ha Delhi, neibhah ha ka dorkhat da pynsñiaw lut ya kiwa emkaaam ka jylla nadooh i dawa ya ka ILP, ki kaam wa yatoh waka Sixth Schedule waka Eight Schedule wei kamjooh wow pynbait ya u pood u ang.
