U montri ki kaam pohyung ka ri, u Amit Shah ynnin ha ka yalang wa kyrpang yong ka North East Council (NEC), da ong u wa nadooh wa chimkhti kam u montri rangbahdooh ka ri ha u 2014, u Narendra Modi da ong u wa lada u pynroi ya ka thaaiñ mihsngi emkaam wow wanrah ya ki Scheme sorkar ha kani ka thaaiñ heiwa da phah u wa man la ka 15 sngi emkaam wow wan ki montri ka sorkar pyrdi cha ka thaaiñ wei wot oo (Modi) leh da wan u cheini da palat 40 sien.
U Amit Shah da ong u wa ka NEC da pynkreh ko ya kiwa boon ki Project wow pynmiat ya i rukom im ki paidbah wei dang em leh chiboon ki kaam wa emkaam u leh ko heiwa ka dhab ki montri ka sorkar pyrdi namo ka Cabinet da rai ko wa 30% na ka mang poisa (Budget) ka sorkar toh u pynemkaam wow pynku ya ki chnong wa dang sahdien.
Da ong u wa ka North-East Council da booh thong ko wa chwa u 2022 hapoh ka ‘Ease of Doing Business’ daw yaklam wa waroh ki jylla khnang wow wanrah ya kiwa seiñ khih cha ka thaaiñ kam ka dak wow lehkmen yei dap 75 ka ri ha u 2022.
Chooh chooh da ong u wa i kaam pynroi ha kawon kawon ka jylla ym ye wow leh du da ka sorkar samen wei emkaam leh ya ki bru samen wow embynta ki heini khnang wow ye u pynsmat u wanrah ya ki kaam pynroi khamtam deiwa pynkrehkaam ya ka thong ‘Ease of Doing Business.’ namo wow pynsuk yaka khayi pateiñ wei wow seiñ khih.
Da ong u leh wa ka sorkar pyrdi da man ko kawa da pynkhreh wow wanrah ya ki kaam pynroi ha ka thaaiñ mihsngi.
Heijooh i por u Amit Shah da ong u wa ka thaaiñ mihsngi toh i mynsien ka India wei emkaam wow sumaar ya ki wei hawa wanrah ya ki kaam pynroi emkaam leh wow yada wei wow pynsah yei man kyrpang ka thaaiñ.
Da ong u wa ka NEC da sdang ya ka da u (T) Atal Bihari Vajpayee heipor wa man u kam u montri rangbahdooh ka ri heiwa da wanrah ko ya kiwa boon ki kaam pynroi ha ka thaaiñ deiwa pynrap wa ka NEC da chna ko hadooh 11,000 Kilometer ki sarok wei da ye leh u pynmih hadooh 7,700 Mega Watt i bordiñ.
Da ong u leh wa nachwa da tip ya ka thaaiñ kam ka thaw ki damok kieñ suloi tangwa nei klam yasuk katni da mih ki khubor wa bha na kani ka thaaiñ.
U Amit Shah da ong u leh wa emkaam wow pynbait noh ya ki kaam kajia pood ha ki jylla neibhah ka ri man ko ka wi, wei hapoh i yahkhmat u Narendra Modi daw ye u pynbiat ya ki pood ka thaaiñ Northeast wei da emkaam leh wow khang yei khayi drugs.
Da kdaw u wa heipor wa yakhun ya ka khlam COVID-19 da e hadooh 7.75 lak metric tonne ki mar baam cha ki 3 klur ngut hapoh ka Pradhan Mantri Garib Kalyan Yojana. Kamwa 30,000 metric ton u dai wa 50 lak tylli ki kum LPG da saam mynkna.
Hapoh ka Pradhan Mantri Kisan Samman Yojana, T. 553 klur dadep thap ha ka Account ki warep, T. 1,707 klur da e hapoh ka Jan Dhan Yojana, T. 2,530 klur da thap cha kiwa yoh myntoi yong ki Scheme waphær waphær.
