U MLA ka Congress na Mawlai uwa man leh u Chief Whip ka liang pyrshah ha Assembly, u Process T Sawkmie da kyntu u ya ka sorkar jylla wow pynhiar noh ya ka dan wa da lum na i phniang kari Petrol wa Diesel neibynta i bha i miat ki paidbah.
Hawa klam ynne ka sngi, u Sawkmie da ong u wa i ku i dor phniang kari da ktah wei da pynkhia ko ya ki paidbah, neibhah wa ku lut i dor yong ki mar ki mata leh. Da ong u man ko iwa sñiawsih wa ka sorkar pyrdi kawa yahkhmat da ka BJP ha Delhi ym ye ko wow khang ya ini i ku dor hanla ki paidbah yahcem ki yei eh neibhah wym biang ki kaam ki jaam da jan waroh chi snem.
Da ong u leh wa ka sorkar India toh u chimkhia ko hajrong ini i ku dor, deiwa pynrap wa hanla ya i phniang kari da wanrah na ki ri wa na baar, tangwa ka sorkar ye ko wow pynhiar ya i dor khnang wa ki paidbah ym chah ktah ki, wei lada ka sorkar ym ye ko wow pynsangeh ya ini i ku dor, pynyoo wa ym hoi ko hei krehkaam.
