Ynnin i miet ka 30 tarik da pynman ya ka yalehke Final yong ka lympung yalehke bol wa tip kam ka 7-A-Side State Championship Football Tournament ha Madan Iaw Pynsin, Rymbai heiwa ka yakhun ya ka Final da man ko hapyrdi ka We United pyrchah ya ka 7Wasa United FC.
Ka yakhun da man ko kawa yoosuk heiwa hadooh wa kut i por yaleh, pyn ar kini ki liang da yoh ki u thap mar chi kool, katwa kamtæ da rai noh wow pynman da ka yachut Tie Breaker heiwa ka We United da man ko kawa jop ya ka 7Wasa United FC da 4-2.
Ya kani ka yakhun Final da pynman ha i miet heiwa da pynemkaam da i bordiñ wow pynche yaka yakhun Final yong kani ka lympung.
Ha kani ka sngi da wan sakhi ya ka yakhun da u Francis Swer kam u kongsan, u Daia Lamare kam u symbood kongsan, hei emlang u montri ka sorkar jylla, u Kyrmen Shylla, u Khroobok Passah uwa man u DSO ka West Jaiñtia Hills, u Patrick Lamare uwa man u Vice President ka WJDSA wa kiwi kiwi.
Kani ka lympung 7-A-Side State Championship Football Tournament toh kawa pynman da ka Northeast Sports Development Foundation (NESDF) chirup i yakrehlang wa ka Soccer 7 India Federation.
