15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1
Advertisement ad1

Da pynkup burom ya ki khynnah puræ wei da thung chnat krehkaam ka Seiñ Kur Dkhar

Ka Seiñ Kur Dkhar Jaiñtia Hills, Wapung Circle ynnin ka sngi 30 Duiatra ha ka yalang wa khian wa da pynman ha ka chnong Pamrakmai, East Jaiñtia Hills, ha ka sien kawa ar, da pynkup burom ko ya ki 15 ngut ki khynnah puræ yong ka Kur Dkhar, kiwa haap hapoh i kdup yong ka SKDJH, Wapung Circle.

Ha ini i pynkup burom ya kitai ki khynnah puræ yong ka Kur Dkhar kiwa da wan chakhmat ha ki Exam waphær waphær yong ki kiwa da pynman wei pynmih Result ha uni u snem 2020 da e ya ki da ka Certificate of Excellence wa kynthup ya ka song poisa.

Ha ini i pynkup burom ya ki khynnah da kynthup leh ya u Ajay Dkhar, na ka chnong Mookhep, East Jaiñtia Hills, u khynnah skur yong ka Khliehriat Higher Secondary School, uwa da wan ha ka kyrdan kawa ynru (6th Position) ha ka Top 10 yong ka HSSLC Commerce, wa da pynyaleh da ka Meghalaya Board of School Education (MBOSE) ha uni u snem 2020, wa u Pynshai Kupar Dkhar, uwa na ka chnong Wapung Chnong, uwa da pyndep ya  Master of Law (LLM) ha ka kyrdan kawa ar na North East Hill University ha u snem 2020. 

Ha kani ka sngi pynkup burom yong ka SKDJH, Wapung Circle, da pynlai ya ka yalang da u Shaniah Skhem Dkhar, President, Seiñ Kur Dkhar Jaiñtia Hills, Wapung Circle hei emlang wei da yoh yei klam na u Ohibait Dkhar, uwa man kam u kongsan yong kani ka sngi, da kynthup wa kiwi tawon kiwa yahkhmat yong ka Seiñ Kur Dkhar Jaiñtia Hills nadooh Central Body, West Jaiñtia Hills, East Jaiñtia Hills, wa na kiwi kiwi tawon ki chnat krehkaam yong ka Seiñ Kur Dkhar Jaiñtia Hills.

Ha  kani hi ka jooh ka sngi, da thung wei pynskem leh ya ka chnat krehkaam wa pura yong ka Seiñ Kur Dkhar ha ka chnong Pamrakmai, da kiwa yahkhmat yong ka Seiñ Kur Dkhar Jaiñtia Hills Central Body, kiwa kynthup ya u Hamjhan Dkhar kam u General Secretary wa kiwi kiwi tawon, kawa  da tip pyrtuid kam ka Seiñ Kur Dkhar Jaiñtia Hills, Pamrakmai Unit, wei heijooh i por leh da pynlait paidbah ya ka Riti Krehkam (Constitution) wa pura yong ka Seiñ Kur Dkhar Jaiñtia Hills.

Share this:
Previous

Pynkup burom wei lehkmen sngi seiñ ka Rotary Club Jowai

Next

Dei miet pynman ka NESDF yaka Final ka lympung yalehbol wa mar 7 ngut chiliang