Ka sorkar Meghalaya ynne ka sngi da rai ko wow pyndam ya kiwa boon ki kyndon kiwa da booh neidaw wa em ka khlam COVID-19.
Hawa yaklam wa ki laad pathai khubor, u symbood montri rangbah ka jylla u Prestone Tynsong, da pyntip u wa ka sorkar da rai ko wow pyndam noh yaki kyndon wow khang yei kamai kari deiwa bood da ki Odd wa Even Number haki thaw wa dang krehkaam ini i kyndon wei u krehkaam ki kamwa jooh 100%.
Heiyatoh won wa ki kari ki bru samen, da ong u wa i Odd wa Even Number u krehkaam hi ki kamwa jooh ha ki thaw wa dang krehkaam ki hadooh wa pynmih hukum da kamwi.
Ha ki thaw maneblai da chah wow em hadooh 75% ki bru iwa da pynku naka chi bhah naka le bhah iwa da booh nachwa iwa krehkaam chisyndon wei ini kynthup ko yaki yalang ki yachem yong niam.
Da chah leh wow wai ki Hostel chisyndon kamjooh ki Crèche, ki yalang pynman dorbar ha ki chnong ki thaw deiwa chah wow em 75% ki bru wei ini kynthup ko leh kam hi ki yap bru, i bia wa kiwi kiwi.
Da pynlait leh yaki kyndon wa yatoh wa ki yalehke Sports kiwa da chah wow pynman waroh ki jait deiwa booh wa kiwa wan paitke toh u em ki 75% na iwa ye ki u em.
Yaki thaw uiñke suwari ym em de booh kyndon yaki heiwa ki khynnah wa hapoh 10 snem leh chah u wan ki deiwa wan lang ki wa kiwa ha yung ha sem.
Da pyndam leh ya waroh ki kyndon heiyatoh wa i krehkaam ki yung krehkaam ki bru samen deiwa chah u krehkaam ki 100%. Tangwa ym pu chah wow pynman yaki Fete wa ki yakob khwe dakha.
U Tynsong da pyntip u wa waroh kini toh kiwa hap leh deiwa bood yaki SOP kiwa daw pynmih da ki chnat sorkar.
Heiyatoh wow wai ki skur nadooh Class I hadoh Class V, ka sorkar da rai ko wow chah u wai malu mala heiwa ki skur ye ki wow pynman Class du kam wow yarap donhi ym toh deiwa pynman Class man-ka-sngi kamwa jooh man wei ini toh neibynta ka Shillong, Jowai wa Tura.
Heiyatoh wa ki Night Curfew, da pyntip u wa u krehkaam hi ki hadooh wa pynmih hukum da kamwi nadooh 11 waje i miet hadooh 5 waje i step.
