U Aloysius Papang u khon yong ka Ebi Mary Papang uwa na Shangpung, West Jaintia Hills uwa da heh da san ha Jowai wei katni sah u ha Bishop Falls, Lower Mawprem Shillong da chah khut sñiawbha u sa chisien kam u symbood kongsan wei kam uwa thoh sur Poetry wei man u samen naka jylla Meghalaya uwa da chah khut sñiawbha wow chimbynta ha ka 3rd International Literary Festival kawa daw pynman haka 27 wa 28 tarik uni u bnai ha Islampur, West Bengal, India.
U A. Papang da man u kam uwi na kiwa thoh Poetry wa dang lung bha yong ka jylla Meghalaya, tangwa ki Poetry yong oo da yoh ki yei tipmit lyngba kiwa boon tylli ki Award kiwa da yoh u wow khur ha ki rynsan waphær waphær ha ka ri India wa cha baar ri leh, heiwa da pynmih leh ya iwa da thoh u ha kiwa boon tylli ki thup thoh Poetry yong ka pyrthai.
Da sdang u wow kyruiñ wow thoh Poetry dang hawa kut yong u snem 2018. Wei hachwa ini da man u kam u sahep sorkar (MFS) heiwa da chim noh u ya i chong ngiah ha u snem 2017 wei da dep mihkhmat u yaka Meghalaya boonsien hapoh ka ri kamjooh cha baar ri.
