U Chairman ka Confederation of Meghalaya Social Organisation (CoMSO), u Robertjune Kharjahrin da ong u wa ki seiñbhalang dang yooluti ki yei yaklam waka sorkar India neibhah ym kwah ki wow em kiwa phah khubor thok cha ka Ministry, wei hadooh katni ka seiñ dang yang ko wow yoh u yachem (Appointment) wa u Montri ka sorkar India, tangwa lada ka sorkar ym burom ko yei kwah phyllu yumut ki seiñbhalang, wei lada ki yakhih wa jai jai ym ye ko wow pynpai ya ki chkoor wa khlot ka sorkar ha kini ki kajiak sngi, neini chakhmat ka seiñ daw hap ko wow pynbna da ki yakhih wa joor.
Da ong u wa lada em ka yaklam hajrong ka ILP, toh u man bait noh wa u Prime Minister, Home Minister wa u President ka ri India, wei lada u Lat ye u wow pynyoh næ pynyachem, neiliang ka CoMSO man ko kawa smat u yaklam ha iwon iwon i por. Ya ini u Kharjahrin da ong u hajrong i ong u Lat ka jylla, u Satya Pal Malik wa ki seiñbhalang ym toh u yakhih ki, tangwa toh u embynta ki ha i yaklam.
U Chairman ka CoMSO da ong u wa ka jylla ym em de ko iyi iyi wow yaklam neibhah da dep wow pynche lut wei da dep leh wow mynjur da ka Resolution ha ka Yungdorbar Chna Aiñ, wei katni ym em yumut de wow yaklam ya i jooh chi i jooh.
Da ong u wa ha i por wa u Amit Shah wan u cha Shillong, ki seiñbhalang da lai ki, tangwa ym em e laad wow yaklam, wei hadooh katni ym pu em khut næ booh por (Appointment) wow yachem ha Delhi, deiwa pynrap wa kattu u yaklam sa wa uyi.
