Ynne ka sngi ka Synjuk ki Waheh Chnong Jowai hapoh i yahkhmat u President u Alan Niangti wa u Secretary, u Riquoma RQ Laloo da yachem ki ya ki seiñ kamai kari kiwa kynthup nadooh ki seiñ kamai Taxi ha Jowai ka West Jaiñtia Hills Taxi Owner Divers Association (WJHTODA) wa kiwa kamai na Jowai cha Shillong wa kynthup ya ka Khasi Jaiñtia Maxi Cab Tourist Association (KJMCTA) kiwa kamai Sumo wa kiwi ki kari khian (Indica, Swift, wa kiwi kiwi ki kari) ka Jowai Shillong Tourist Cab Association (JSTCA).
Ha ka yalang, ki waheh chnong da kyntu ki wow pynhiar ya ka bai kari na kini ki le seiñ khamtam hadien wa da pynyinsur ya ki kyndon yada na u COVID-19 wei wa da pynhiar ya i dor i phniang kari.
U Niangti hadien ka yalang da ong u wa neiliang ki seiñ da rai ki wow pynhiar ya ka bai kari heiwa ki KJMCTA da rai ki wow pynhiar ya ka bai kari cha ka T. 130 samen wei u chong 10 ngut ha kawi ka Sumo katwa ka JSTCA da rai ko wow pynhiar cha ka 180 samen heiwa u chong 4 ngut kawi ka kari.
Heiyatoh wa ki Taxi ha Jowai, ka seiñ WJHTODA da pdiang ko wow pynhiar ya ka bai kari heiwa u chong 4 ngut ki bru wei neiliang u Riquoma Laloo da e nongmuna u wa ka bai kari u man ko T. 20 samen (lada Reserve) wei lada chong boon bru (4 ngut u man ko T. 10 samen) deiwa pynrap wa lada ku cha Ladthadlaboh u man ko T. 20 samen tangwa lada boon ngut u man ko T. 10 samen, cha Pohchnong, Chutwakhu, Khimmusniang wa kiwi ki thaw cha kani ka thaaiñ u man ko kamwa jooh hi.
Da pyntip leh wa ka WJHTODA daw yachem ko wa u DTO ka District ha ki sngi wow wan yow rai khaddooh ya i dor bai kari hapoh Jowai kamjooh leh ka JSTCA daw chong pyrkhat ko wa ki dkhot ka seiñ wow rai khaddooh hajrong ini i dor neibhah daw emkaam wow chong pyrkhat wa kiwa na thaaiñ Khasi Hills hajrong ini.
Neiliang ka Synjuk da pynsñiaw ko yei kmen mynsien hadien wa ki le seiñ da pdiang ki wow pynhiar ya ka bai kari deiwa ong wa yeini da leh toh neibynta i bha i miat ki paidbah.
