Hadien wa ka sorkar da pynhiar ko ya i dor yong i Petrol wa Diesel, heiwa ka yakhih yong ki kari kamai hapoh ka lama yong ka Meghalaya Joint Action Committee of Commercial Vehicles (MJACCV) da dawa leh wow maap ya i dan yong ki kot kari da 50% neidaw wa ktah i kamai na i wan ka khlam COVID-19 ha u snem wa da dep.
Ynne ka sngi neiliang u Montri ka chnat Transport yong ka jylla, u Sniawbhalang Dhar da ong u wa ka sorkar ym pu yaklam ko iyi iyi wow maap ya ka dan yong ki kot kari kamai.
Hawa klam wa ki kattu katni kiwa thoh khubor, u Dhar da ong u wa ka sorkar ym pu yaklam ko iyi iyi i leh hadooh katni, tangwa da chim ya i rai wym daiñ kuna ya kiwa slem u su næ kiwa haap wow pynthymme ya ki kot ki sla kari.
Da ong u wa ym du kiwa yah kari kiwa chah ktah na i wan yong ka khlam, wei lada maap ya ki kari kamai, kiwi leh daw dawa ki yei jooh, wei ka sorkar daw hap ko wow pyrkhat sani bha chwa wow chim ya i rai neibhah wot ka sorkar leh chem chitom ko.
Hawa kylli hajrong i pynbaad wa ka sorkar da pynku chooh chooh ko ya ka dan, u Montri da ong u wa i pynku ym toh du yaka dan kot kari, da pynu leh yaka bai kari ynnin u snem hadien kamwa 10 snem wa khlem pynku ya ka bai kari.
Hawa kylli chooh chooh lada ka sorkar ye ko næ ym ye wow maap kajiak yaka dan hanla ym toh waroh 50% kamwa da dawa da kiwa yah kari kamai, u Dhar da ong u ka sorkar daw bichaar chwa ko ya iyi wa emkaam wow leh.
