U Montri Rangbah ka jylla, u Conrad K Sangma da ong u wa i slem wow yoh tulop ki wakreh ka Garo Hills Autonomous District Council toh iwa da lai da ki snem kattu chwa wow chimkti ka sorkar MDA, deiwa kam wa hadien wa ka NPP da chimkti ko wow synchaar da ye ko wow su teiñ ya ka tulop ki wakreh ka Council.
Kam wow kdaw heini ki wakreh ka GHADC hapoh ka lama yong ka Non Gazetted Employees Association (NGEA) da lai paidbah ki ynnin ka sngi ha Tura wow pynbor wow su noh ya ka tulop kawa da sahteiñ la kamwa 3 snem weiwa ka sorkar toh u pynlait noh ko ya ka dan wa T. 55 klur cha ka Council.
Kini ki wakreh ka GHADC kiwa na ki chnat waphær waphær da maham ki leh wow dam u chimbynta ha ka Election MDC ka GHADC ka wow man ha ka 9 Naitung (April) lada ka sorkar ym pynkrehkaam ko yei dawa yong ki.
U Montri Rangbah ynne ka sngi da ong u wa ini i kaam ymtoh iwa ye u leh pyn kattæ wei ka sorkar dang thooh ko ya ki laad wow su tulop ya ki wakreh ka GHADC, deiwa pynkynmoo leh wa chwa ka Christmas ka sorkar da yarap ko wow su hadooh 2 bnai ka tulop.
Heiyatoh wa i pynbaad wa em i baam-tooh ha ka GHADC, da ong u wa ka sorkar da thung ko ya ka dhab wow thooh ya ka yukheiñ wei hadien ini daw leh yeiwa emkaam.
