Hadien wa chah baad man i por ha u President ka Bharatiya Janata Party (BJP) Meghalaya, u Ernest Mawrie, neiliang u President ka National People’s Party (NPP) uwa man leh u Montri Rangbah ka jylla da ong u wa dadep yaklam yeini wa ki heh ka BJP ha Delhi, heiwa da ong u leh wa kiwa boon na kiwa kyrchaan ka BJP ha kani ka jylla ym sñiawsuk ki yei leh u Mawrie wei da pynsñiaw leh wa emkaam wow pyndooh noh ya oo ya ka chuki President.
U Conrad K Sangma da ong u wa u da yaklam wa waroh ar ngut ki MLA ka BJP ha ka jylla kiwa em ha ka sorkar, heiwa da mynjur ki wow kiar na iwon iwon i klam wa khlem yurim pyrchah ya ka sorkar, deiwa pynrap leh wa waroh ar ngut ki MLA kwah ki wow pyndooh noh ya ka chuki President ya u Ernest Mawrie.
Da ong u wa da yaklam leh wa ki heh ka BJP ha Delhi hajrong i klam pyrchah u Mawrie ya ka sorkar deiwa pynsñiaw yei mynsien sñiawsih yei leh u President ka BJP Meghalaya, tangwa iwa sah won chong i ha i rai ka BJP.
