Ka KSU Narpuh Circle da pyntip ko wa neidaw wym chimkhia ka sorkar jylla hajrong u pood u ang wa ka jylla Assam, da pynman ko ya ki bru Assam wow toor pud wei pynsih pynpra ya ki thaw ki bhaw wei wow baam-ke ya i spah rymaw iwa man leh i dooh nong yaka sorkar jylla Meghalaya iwa man da ki phaw lak.
Ini da ong ka seiñ pynyoo ko yei tlot ka jylla dei wym ye ko wow kdoh u khoom yei wan kiwa na Assam ha ka wah Malidor, East Jaiñtia Hills ha khappood wa ka Assam hadooh wa ka wah da kylla khyndaw chyiap iwa da chem leh hawa lai pait ynnin ka 24 tarik da ki dkhot ka KSU Narpuh Circle hapoh i yahkhmat u KS Suchiang, President.
Kamtæ da kylli iyi leh ka sorkar jylla lyngka chnat Forest wa kammon yoh wow khloh moo da ki nong Assam pyrchah yaka aiñ hapoh u pood ka Meghalaya iwa dang pteiñ katni, wei lym mih paidbah kiwa chong chnong Ratacherra ha kini ki bnai wa da dep wow pynpra wow khang ya u sarok wa da chna pyrchah yaka aiñ da ki bru Assam yow lai khloh moo naneiñ ka yingkieñ, lym kamtæ wot utu u moo na khlieh yingkieñ da lut u katni.
Ka seiñ da pyntip ko wa da hiar ko la kattu katni sien yow beh ya kitai ki nong Assam wei hadooh katwon sien u ye u lai mih ma mih yow leh ya ini lada ki bor District ym leh ki iyi iyi leh wei ym tip leh iyi u leh ka sorkar.
Ka seiñ da dawa ko leh wow booh Police Outpost ha yingkieñ Malidor kamwa ka Assam da booh ko, tangwa i dawa toh iwa sahkut kamtu donhi. Da kylli leh wa sa katwon tylli ki thaw ka Meghalaya wow lai cha ka Assam wei ka sorkar leh toh u khlam che ko lada nood ko næ ym nood wow klam hajrong kani ka kaam khappood wei ym toh wow suki hi-eh khnang wa ka seiñ u tip ko wow leh yeiwa emkaam.
