February 24, 2021

U mih noh u Hek wa u Sanbor na ka BJP lada ym kylliang ya u President: VP-BJYM

Advertisement ad1

I awri awra hapoh yung ka BJP Meghalaya hapyrdi kiwa kitkaam ka seiñ wa ka sorkar jylla khamtam hajrong i kaam baam-tooh ha ka sorkar dang joor i katwa dang mih ki sngi.

Ynne ka sngi neiliang u Vice President ka seiñ khynroo ka BJP ya kawa tip kam ka Bharatiya Janata Yuwa Morcha (BJYM) u Wallambok Khongwir da ong maham u wa hajrong ini i kaam ka seiñ daw yaklam ko manda poi u montri ki kaam pohyung ka ri, u Amit Shah ha ka Shillong ha u Wisu (March) uni u snem.

U Wallambok da ong u leh wa u montri ka sorkar jylla uwa man leh u MLA ka BJP na Pynthorumkhrah, u AL Hek wa u MLA ka Party na Shillong South, u Sanbor Shullai da man ki kiwa bien wow mih (Resign) noh na ka seiñ lada ym kylliang de ya kiwa mihkhmat ka Party ha ka jylla.

Da ong u leh wa heiyatoh wa ini i kaam wow dawa pynkylla noh ya kiwa mihkhmat ka Party, ha kini ki sngi wow wan daw boon wow kyrchaan ya ini i dawa pynkylla ya kiwa mihkhmat ka seiñ na kiwi ki District.

Chooh chooh da pyntip u leh wa chwa wow leh iwon iwon i kaam neini chaphrang u man i toh du hadien wa yaklam wa ki bor wa ha khlieh ka Party ha Delhi.