Ka Shillong Cricket Association-A waka Tura District Cricket Association-A da jop ki ynne ha ki yalehke yong ki haka Inter-District U-23 Cricket Tournament ha Nongpoh wa Mendipathar wa pynman daka Meghalaya Cricket Association.
Haka Zone 1, ka SCA-A da jop ko yaka East Khasi Hills Cricket Association da chi Innings wa 110 Run, katwa haka Zone 2, ka TDCA da pynrem ko yaka East Garo Hills Cricket Association da chi Innings wa 29 Run.
Deiwa pteiñ neiwa ieh ynnin ka sngi iwa 15/5 haka Innings wa ar wa da phah leh Follow-On daka SCA-A, ka EKH da em ko 185 chadien. Neiliang kiwa Bat, u Winningstar Khongjoh (28) wa u Wankitlang Nongpluh (18) toh kiwa da ye u kamai Run tangwa ka EKH da dooh lut ko ya ki Wicket deiwa kamai 90 Run, iwa boon ya iwa kamai ki haka Innings wa nyngkong iwa 76 Run. Neiliang kiwa kawang bol, u Abhishek Kumar toh uwa da leh bha uwa yoh 5/13 (waroh 7/22) katwa u Bipin Ray da yoh u 2/12.
Ha Mendipathar, ka yalehke kawa sdang ynnin ka sngi, yaka TDCA da phah Bat nyngkong daka EGH hadien wa jop ko yaka kylla khlem. U Sengpan T Sangma da yahluti u nakhmat deiwa kamai 87 Run yow pynpoi yaka liang yong oo cha 205/10. Da haap u ha u Prakash Prasad, uwa yoh 6/54.
Ka EGH won da dooh ko yaki Wicket deiwa kamai 69 Run. Uwa rap ye u kamai Run toh u Anaiush B Marak (19). Na kiwa kawang bol, u Cham Sangma (4/7) wa u Purav Agarwal (3/17) toh kiwa da leh bha.
Ka East Garo Hills da phah yaka wow leh ko yaka Follow-On heiwa da kamai ko 107 Run deiwa dooh lut waroh ki Wicket. U Prasad da yoh u 49 Run, katwa u Agarwal won da yoh u 4/28 (waroh 7/45), heiwa yoh u leh yei naam Man of the Match.
