Ka Congress kawa em katni haka liang pyrchah ha Mizoram, da paan maap ko na ki Balang ki niam waphær waphær ka Mizoram, ka jylla wa boon ki Christan, kamjooh na ki seiñ ka imlang sahlang (NGO) yei rai wow chah u wai yaki dukan dai kiad ha Mizoram 6 snem nachwa heipor wa em ko hei bor iwa da wanrah yei rem ka Party haka Election MLA ha u snem 2018.
Uwa yahkhmat ka Congress ha Mizoram u Lal Thanzara da pynsñiaw u yei sihlet yeiwa leh ka sorkar hapyrdi u 2008 wa 2018 heipor wa em ka Party hei bor.
“Da chah i wow wai ki dukan dai kiad, da e ya ki Alcohol Permit iwa man pyrchah ya ki Balang wa ki NGO, wei ini da man ko i daw wa rem i haka Election,” da ong u Lal Thanzara.
Ka sorkar Congress kawa yahkhmat da u Lal Thanhawla da chah ko wow wai ki dukan dai kiad haka jylla Mizoram kawa man ka Dry State namo ka jylla wa khang wow dai kiad heiwa ha u Wisu (March) 2015 da chah wow wai ki dukan dai kiad, wei da man ko ka phang Election hadien 3 snem.
Neiliang ka Congress ha ki por wa synchaar da sñiaw ko wa ym toh wow khang sbak yei dai kiad, katwa ka Mizo National Front won da kwah ko wow khang sbak yei kiad. Hadien wa rem ka Congress haka Election wei manda wan biang ka MNF hei bor, da khang biang ko yei kiad ha u snem 2019.
“Kiwa yahkhmat ka Congress da kular ki wym e bor wow dai kiad lada jied biang ki bru ya i haka Election 2023. I da paan maap i na ki Balang wa ki NGO yei bakla yong i,” ong u Lal Thanzara, uwa jooh man leh kam u Montri ka chnat i chait i khiah.
