Ynnin ka sngi ka seiñ Hynñiewtrep Youth Council (HYC) da e dorkhat ko cha u montri ka chnat bordiñ ka jylla, u James Sangme wow pynsangeh chwa ya i dai wei pyndait namo ka Supply and Installation of Smart Meters and Associated Services yong ka Meghalaya Power Distribution Sector Improvement Project ka Asian Development Bank .
Ka seiñ da ong ko wa da pynlait T. 232,96,39,343 hapoh ka Project yong ka “Satnam Global Infra Projects Ltd, JPM Industries Ltd and Inhemeter Co Ltd” wow pynpoi wei wow pyndait ya kini ki 2,07,015 tylli ki Smart Meter ha Shillong wa kiwi ki thaw.
Ka HYC da ong ko wa i dor wow dai wei wow pyndait ya uwi pa uwi u Meter chongdor i T. 9,444.44 (khlem ka dan), iwa rap sy’ad ya kiwi ki jylla ka ri heiwa i dor da man i du T. 3,000. Da kylli wa neiyi i daw wa da sy’ad i dor hapoh ka jylla wei emkaam wow tip ki paidbah yeini.
Da ong ko leh wa ya i lut hapoh kani ka Project toh lyngba ka ram na ka ADB wei ka MeECL/MPDCL daw haap su ko ya kani ka ram ha ki por wow wan iwa daw ktah chooh chooh ya ka neibhah wa da man ko kawa da dap ram.
