U montri rangbah ka jylla, u Conrad Sangma chirup wa u MLA, u Brening A. Sangma, ynne da booh moo-yurim ki wow chna pynmiat ya u sarok Dalu-Baghmara Road ha Dalu, West Garo Hills.
Uni u sarok toh uwa jrong 20.853 Km wei ya ka poisa neibynta ini i kreh na ka Meghalaya Integrated Transport Project (MITP) da kynjoh i T. 43,45,27,900 wei da booh thong wow pyndep hapoh 36 bnai donhi heiwa i kreh u kynthup i ya ki 5 tylli ki yingkieñ khyndaw-bilat.
U Conrad da ong u wa uni u sarok toh uwa da angnood ki paidbah da slem wei ka sorkar MDA u pynman sakhiat ko yeini i angnood wei daw yarap bha u ya ki paidbah ka thaaiñ khappood ka Dalu-Baghmara khamtam hei khayi pateiñ.
Da pyntip u wa na ka T. 100 klur wa da e ka World Bank hapoh ka Meghalaya Integrated Transport Project ha jylla, T. 43 klur toh du neibynta uni u sarok donhi.
Uni u sarok daw pynyabi u ya ka West Garo Hills wa South Garo Hills District wei daw yarap bha u hei khayi pateiñ khamtam ki mar rep wa rep ki bru ka thaaiñ.
