Ka seiñ Hynniewtrep Youths Council-East Jaiñtia Circle (HYC-EJC) wa ka Jaiñtia Youth Federation-East Jaiñtia Hills (JYF-EJH) ynne ka sngi da e dotkhat ki ha u Executive Engineer ka MePDCL, Khliehriat Distribution Division heiyatoh wa i dooh bordiñ ka chnong Suchen la kamwa 8-9 snem kattu.
Ka seiñ da phylla ko wa ka chnong Suchen (Suchen Dhana, Suchen Rim, Suchen Moolieh wa Suchen Lum Iarain) da dooh bordiñ ko kattu la kamwa 8-9 snem wei hadooh kani ka juk thymme, ki paidbah ka chnong dang pynemkaam ki da ki charak wa mombati iwa da ktah joor ya ki khynnah skur.
Neiliang ki ar seiñ da dawa ki na ka yung krehkaam ka MePDCL wow pyndep noh ya ki kaam wa sahteiñ hapoh ka Scheme Pradhan Mantri Sahaj Bijli Har Ghar Yojana (Saubhagya) kawa da sdang nadooh u 2018 hapoh ka chnong.
Neiliang u EE ka MePDCL da kular u wow chimkhia yeini wei wow pyndep smat noh yei kreh.
