Kamwa da ya tiplang wa ka 8 tarik u Wisu toh ka sngi kyrpang yong ki kynthai kawi tip hei ktien para kam ka International Women’s Day, kamtæ ka Seiñ Kynthai ka Dorbar Chnong Loom Sooiung leh kam ka dak i leh burom ya kani ka sngi hei janmiet da pynman ko ya ka yachemlang wa kyrpang ha yung yonglang ka Dorbar Chnong hei sakhilang ka Phidalia Toi kam ka kongsan, u Marsan Pakma, u Waheh Chnong ka Dorbar Chnong Loom Sooiung Newhill, ki manpa wa ki khon khynroo khyllood.
Ka Emidaka Gatphoh kam ka chongknor yong kani ka janmiet da e ko ki kyntien yahkhmat heiyatoh wa kani ka sngi, ka Deimonki Tang, Secretary Seiñ Kynthai da pachat ko ki kyntien pdiang burom katwa ka E.F. Gatphoh, Adviser seiñ kynthai Dorbar Chnong Loom Sooiung Newhill e ko ki kyntien sñiawngooh.
U Marsan Pakma, waheh chnong ka Loom Sooiung Newhill, Jowai hawa klam ha kani ka janmiet da yaroh u ya ka Seiñ Kynthai wei kitbok kitrwiang u leh wow nang kap nanglai ko chakhmat da ki kaam wa miat wa bha ki yong ka hei wow chakri ya ka imlang sahlang yong ka chnong ka thaw.
Chooh chooh leh da pynkyrpang ya kani ka sngi yong ki kynthai næ ki manbei deiwa pynkup burom ya ki arngut ki ASHA yong ka Dorbar Chnong Loom Sooiung kiwa da kreh chitom wow e i chakri wamiat wabha ya ki khon ka chnong ka thaw ha ki por wa em i yaleh pyrchah yow khñiang khlam COVID-19 neitæ i pynkup burom leh ya ki arngut ki manbei kiwa da e i chakri dei sñiawkhia hei wow pynlaibait lai ryntih ya ki kaam heiwon heiwon i por iwa ka Dorbar Chnong emkaam ko ya ka kti timun tidiang yong ki.
Ka Phidalia Toi hawa e kyntien heiyatoh wa kani ka sngi ki kynthai, da kdar ko wow pynsñiaw yei lai luti yong kani ka sngi wa ki daw kiwa pynman ya ka United Nations wow e burom ya kani ka sngi kam ka International Women’s Day.
Khana ko leh wa i sdang yong ki kynthai u yakhih pyrchah nyngkong dooh cha ki tai ki ri sepsngi toh yei bhah i riam i bait neitæ iwa ar yei bhah wow yoh u jied ya kiwa mihkhmat ha ki yung dorbar chna aiñ wei kat hadooh wow yoh ki kynthai yeini i dawa, chimpor ko ya ki da ki phaw snem wow yaleh.
Hawa kyruiñ won cha ka ri India khana ko, ki khon kynthai chah banbeiñ ki ha ka niam ka rukom, dustur riti, tangwa iwi wa sñiawsuk ong ko, wa ka jaitbru yong i toh ka jaitbru wa stat, ka jaitbru watip u kheiñkor kheiñ burom ya ki kynthai. Iwa khaddooh chwa wow chong kdar ko ya ka phang ka wa ong ‘Choose to Challenge’ deiwa kyrsu kyntu ko ya ki khon kynthai deiwa ong, kynmoo kani ka por ym toh ka por wow yaleh pyrchah wa ki chynrang, ka por kawa kam ki kynthai u yieñ tylli i wow yaleh pyrchah ya ki rukom tynjooh wa boonjait kiwa yatoh wei miat i bhah ka imlang sahlang yong ki kynthai kamjooh yong ka chnong ka thaw, ka ri ka muluk.
Chooh chooh ya kani ka sngi da pynchongchit pyntympang da ki rwai wa ki chaad wa da chimbynta da ki manbei, ki khyllood wa ki diahkhian.