U Montri Rangbah ka jylla u Conrad Sangma, ynne hapoh ka yung dorbar da ong u wa i thrang ka sorkar toh wow pynlait waroh iwa dang sah ki wakreh.
Yeini da ong u hawa klam yeiwa sah ka ka tulop (Arrear) ki wakreh ka sorkar jylla hadien wa kylli u MLA ka Mawlai u Process T Sawkmie lada ka sorkar hun ko wow pynlait du chi bhah na ka 30% kawa dang sah ka Arrear ki wakreh.
“Ki wakreh em hok ki wow yoh ya. Ka poisa toh kawa toh u yoh ki ha ki le bynta. Ki wakreh tip ki ya ki kyndon. Daw leh i katwa ye yow pynlait yaka poisa wa sah,” da ong u Conrad.
Da pyntip u wa 7.5% na kawa dang sah ka 30% dapoi ko T. 38 klur kawa da pynlait haka 11-02-21.
U Montri Rangbah da pyntip u leh wa ha uni u snem mang tyngka da duna bha i yoh poisa naka sorkar pyrdi neidaw ka khlam COVID-19 wei ka sorkar da leh ko katwa ye yow ye u pyndap pynbiang deiwa pynrap wa yow pynlait yaka 22.5% ka Arrear wa dang sah ha uni u snem mang poisa 2020-21 daw pyrkhat katkam wa em poisa.
Da ong u wa naka dan wa da mang ka sorkar pyrdi wa toh u yoh T. 6490 klur katwa iwa yoh ka jylla da poi ko T. 4698 klur iwa duna da T. 1792 klur.
Chooh chooh da ong u wa ka dan wa toh u yoh ka jylla u lum da mang T. 2377 klur tangwa da yoh T. 1859 klur iwa duna da T. 518 klur.
Katwa yaka poisa kawa toh u mih kawa ym toh na ki dan toh u man ko T. 690 klur tangwa da yoh T. 481 klur iwa duna T. 209 klur.