U Montri Rangbah ka jylla, u Conrad Kongal Sangma da pyntip u wa em hadooh 95,189 ngut kiwa chong chnong wa da uiñ biang cha ka jylla hadien wa wan ka khlam COVID-19 ha u snem wa dadep.
U MLA ka NCP na Gambegre, u Saleng A Sangma ynne ka sngi ha Yung Dorbar Chna Aiñ da kylli u yei em kiwa wan uiñ cha ka jylla wei heijooh i por katwon ngut kiwa da yarap ka sorkar wow seiñ kreh ki.
Hawa jubab yeini, u Conrad da ong u wa em 502 ngut ha ka bynta wa nyngkong, kiwa da yoh yarap lyngba ka Livelihood and Gainful Employment wa da e yarap da ka North Eastern Council.
Da ong u wa ini i yarap poisa cha ki khynroo khyllood toh wow seiñ kreh ki hadien wa da chah hikai ki wei hadien wa da dooh kreh ki cha kiwi ki jylla.
U Conrad da ong u wa katni da em kiwa kreh ha ki Corona Care Centre, wei neibynta wow yoh yarap poisa na ka NEC, da em leh ki kyndon wow bood khamtam wow pynbiang ya ki kot ki sla, wei i yarap toh neibynta kiwa kwah u seiñ kreh kiwa kynthup ya kiwa lai mylla leh.
