Hadien wa mih khubor wa em ki karkhana hapoh ka jylla kiwa sah da ki phaw khlur ka bai bordiñ kawa ym pu em su ki, ynne ka sngi hapoh ka yung dorbar, neiliang u MLA ka liang pyrchah u Zenith Sangma da paan u yei pynche hajrong wa kammon u leh ka sorkar ya ini.
Neiliang u Montri ka chnat bordiñ u James Sangma da ong u wa ya ini u leh hapoh ka One Time Settlement (OTS) Scheme kawa da pynkrehkaam yow yoh noh yaka bai bordiñ kawa da sah boon snem kawa lada ym leh kamni ym yoh de ya kani ka bai bordiñ. Da ong u leh wa kani ka Scheme ym toh du neibynta ki karkhana wei man ko leh neibynta yong ki bru paidbah, deiwa pyrkhat wa toh u e laad ya ki wow su ki yaka bai bordiñ ha kani ka chisien heithaw wow neh sah ko da ki snem.
Heiyatoh won wa i pyndooh bordiñ ya kiwa ym em su bai bordiñ, neiliang u James da pyntip u wa da e daka Notice kawa 15 sngi chwa katkam ka aiñ Electricity Act 2003.
Niliang u MLA ka Nongpoh u Mayralborn Syiem da kylli u leh wa lada kani ka One Time Settlement Scheme daw pteiñ chooh namo ym pteiñ de yaka neidaw wa yarap ko ya kitu kiwa dang sah ka bai bordiñ.
U James da jubab u wa da pteiñ ya kani ka Scheme hadooh ka 31 tarik uni u bnai tangwa lada e ma e por, daw man ko iwa mar dei khangtleiñ yei thmu kani ka Scheme kawa pyn na i pyrtuid kawa ong kawa chi por donhi, kawa e kattu katni i por ya ki bru wow chim kabu ki ya kani ka Scheme kamtæ lada pteiñ ma pteiñ yaka ym em dor de kani ka Scheme. Hanla kattæ leh lada chem wa boon ki bru ym tip ki chaphang kani ka Scheme, ye wow pteiñ chooh chooh yaka.
U MLA ka Nongpoh da paan pynche u leh yeiwa em kiwa da chah ah bordiñ hanla da sdang ki wow su yaka bordiñ wa sah heiwa ki karkhana kiwa heh kiwa sah da ki klur ka bai bordiñ won ym em chah ah ki.
U James da jubab u deiwa ong wa ya kitu kiwa da dep su daw pyndait biang ya i bordiñ yong ki wei lada em kiwa chah ah hanla da sdang wow su, ye wow wanrah ya ini chakhmat yow leh ya iwa emkaam kamjooh leh lada kiwa chah ah toh kiwa ym em yoh Bill, daw chimkhia u ya ini.
