U montri rangbah ka jylla, u Conrad K. Sangma ynne da booh mooyurim u wow pynku kyrdan ya ka Mawryngkneng PHC cha ka Community Health Centre (CHC) ha Mawrynkneng, East Khasi Hills hei emlang u symbood montri rangbah, u Prestone Tynsong, u montri ka chnat i chait i khiah, u A.L. Hek, u montri ka chnat Transport, u Sniawbhalang Dhar u MDC uwa man kam u Chairman ka KHADC, u Pyniaid S Syiem wa kiwi kiwi.
U Conrad hawa e yei klam da ong u wa ki thaw sumaar ha ka jylla da man ki ki phang wa haphrang dooh ya ka sorkar wa katni wei i pynku kyrdan ya ka Mawryngkneng PHC daw pyntikna ko yei chakri wa khlem sangeh ya ki paidbah.
Heiyatoh wa i duna ki thaw sumaar ha ki thaw palat sor, u Conrad da ong u wa emkaam chiboon wow leh yeiwa emkaam wow pynjanai ya ki thaw sumaar nadooh ki yung, ki tiar ki tar, kiwa kreh wa kiwi kiwi.
Da ong u leh wa ka sorkar MDA yaleh bha ko wow pynbha ya i kaam wa yatoh wa i chait i khiah liang wanang khamtam ha ki thaw palat-sor ka jylla wei ini ymtoh du heini neibhah da emkaam wow pynku kyrdan leh ya ki Sub Centre cha ki PHC, ki PHC cha ki CHC wei da emkaam leh ya ki yung wa thymme khamtam ki wakreh.
U Conrad da ong u leh wa kam chibynta yong ini i bynta, ka sorkar da angnood ko wow leh ya ki kaam wa heh deiwa yoh yarap poisa na ka World Bank.
Heijooh i por da ong u leh wa uni u snem toh uwa khroo bha ya ka jylla neibhah wa daw pynkrehkaam ya i kreh wa heh dooh (Big Project) dei yoh yarap na ka World Bank, heiwa daw chna ya ki yung thymme ha ki PHC wa CHC, i chna pynmiat ya ki yung thaw sumaar, u pynkrehlaam ya ka Implementation of Telemedicine wa Information Technology wow pyntikba yei chakri wa paka ya ki paidbah.
Heiyatoh wa ka Mawryngkneng CHC, u Conrad da pyntip u wa u kynthup ya ka Trauma Centre, ka Blood Bank kamwa da tyrwa da u montri i chait i khiah u A.L. Hek, ye wow pait yeini mynried.
