Hadien wa mih boon i eh heiyatoh wa i rukom su dan ha ka Toll Plaza Ialong, ka All Jaintia Tourist & Commercial Vehicle Association (AJTVCA) da yoh ko leh ya i yutip wa ka NHAI ym pdiang de ko ya i pynbait wa da dep pynbait ha ka yalang kawa man ha yung krehkaam u DC ha u bnai wa dep heiwa da ya emlang u Deputy Commissioner ka West Jaiñtia Hills, u SP, DTO, ki sahep sorkar deiwa emlang leh ki seiñbhalang wa ki bru ka NHAI heiwa da pynbait yow su chwa ka bai lai luti kamwa jooh leh nachwa.
Ka All Jaintia Tourist & Commercial Vehicle Association chirup wa ki seiñbhalang kiwa khynthup ya ka MPUF, JYF, JSU, JSM, HYC da khut pynman ki yaka yalang wa jhan ynni i janmeit ka 16 tarik wow yaklam yei eh ki paidbah heiyatoh waka Toll Plaza wei ha kani ka yalang da e yumut wei da rai wow khut da ka yalang paidbah yow pynsñiaw ya i eh wa ki bru yong ka Ri Loom Jaiñtia yachem ki ha katai ka Toll Plaza.
Kamtæ neiliang yong ka All Jaintia Tourist & Commercial Vehicle Association da kyrpaad joor ko ya waroh kiwa yah kari wa ki tre kari kiwa em hapoh Ri Loom Jaiñtia nadooh ki kari khian hadooh ki kari heh wow sñiawbha phi u ya wan cha kani ka yalang kawa daw pynman.
Chooh chooh ka Association da kyrpaad ko leh ya waroh ki Waheh Chong wa ki seiñbhalang kamjooh ya ki paidbah wa chong chnong yong ka Ri Loom Jaiñtia kiwa em ya i kitkhlieh ya i yap i im u paidbah wow sñiawbha phi u ya wanlang cha kani ka yalang kawa daw pynbna won yaka tarik wa i thaw hadien.
