U Montri ka chnat Bordiñ ka jylla, u James PK Sangma da ong u wa ka tarik wa khaddooh neibynta ka bynta wa ar wow paan ya ka ram yong ka Atmanirbhar Bharat Abhiyan toh hadooh ka 31 tarik uni u bnai, heiwa da kyntait u leh wa ka sorkar ymye ko wow yoh ram ha i por wa da booh.
Hawa kylli ynne ka sngi, u James da ong u wa ka North Eastern Electric Power Corporation (NEEPCO), kawa da phah ya ka sorkar wow pynkhooid noh chwa ya ka ram wa sah wa kani ka Company, wei lada ymye daw pyndooh ya ka bordiñ nadooh ka 20 tarik uni u bnai chiteiñ synyaaw. Da pyntip u wa ka sorkar da yaklam ko wa ka NEEPCO wow pyndooh ya i eh.
Da ong u wa ka sorkar dang thooh ko ki laad wow su ya ka ram wow lait na i chah ah bordiñ ha ka jylla deiwa pyntip leh wa wot ka bynta wa ar yong ka ram ABA da kynjoh ko kamwa T. 230 klur.
Ynnin ka sngi ka North Eastern Electric Power Corporation (NEEPCO) da rai ko wow sangeh noh u e ya ka bordiñ cha ka Meghalaya nadooh ka 20 tarik uni u bnai neidaw wa ka Meghalaya Power Distribution Corporation Limited (MePDCL) ympu su ko ya ka ram kawa kynjoh T. 504.41 klur.
Katkam ka chithi wa da phah da ka NEEPCO cha ka North Eastern Regional Load Despatch Centre (NERLDC) ha ka 16 tarik uni u bnai, da ong wa ka MePDCL ymye ko u su ya ka ram cha ka NEEPCO.
Ha kawi won ka chithi wa da phah da u Joint Secretary ka chat bordiñ ka sorkar pyrdi kawa da phah cha u Secretary ka sorkar Meghalaya u Pravin Bakshi ha ka 12 tarik uni u bnai, da ong wa hanla ka sorkar pyrdi da elaad ko ya ka MePDCL wow chim ram hapoh ka Atmanirbhar Bharat Abhiyan kamwa T. 1345.72 klur tangwa ka MePDCL dang chim ko du T. 386.86 klur na ka REC wa PFC.
Da ong wa ka MePDCL ympu phah kyrpaad ko cha ka REC wa PFC wow pynlait chooh ya ka ram ha ka wat kawa ar.
