U Symbood Montri Rangbah ka jylla, uwa pait leh ya ka chnat Veterinary & Animal Husbandry, u Prestone Tynsong da pyntip u ynne ha yung Dorbar wa da yaklam u wa u Superintendent of Police ka Ri Bhoi District, wei da kylli u wa kammon pdiang u ya ka ujor na kiwa wan na Delhi, kiwa ymtip ya ka aiñ wa ki adong wa jylla leh ko.
U Prestone da ong u yeini hawa pynche ya i yania wa wanrah da u MLA ka Congress na Umroi, u George B Lyngdoh hajrong i ku syndet i dor i doh masi ha nongbah Shillong, wei ya kani ka Motion da kyrchaan lang leh da u MLA ka Congress na Mawlai, u Process T Sawkmie.
U Symbood Montri Rangbah, hawa pynche yeini da ong u wa hadooh katni ympu em kawon kawon ka aiñ næ ka hukum ya ka jylla Meghalaya kawa khang næ pyrchah yei ah doh ya ki masi deiwa pynrap leh wa ka jylla Meghalaya toh ka jylla kawa baam bha du ya i doh masi hawa nujor wa kiwi ki jylla.
Da pyntip u wa ini i kaam katni dang sah i ha ka yung kasari District Session Judge yong ka Ri Bhoi, tangwa da pyntip u wa da yaklam wa ka Hima Mylliem wa ka KHADC, wei da kular u leh hapoh ka yung Dorbar wow wai biang ya ka yaw masi ha Khanapara hapoh chi sngi ar sngi.
Kam wow pynkynmoo heini wa ya ka yaw dai masi ha Khanapara, Ri Bhoi District da chah khang ko nadooh ka 1 tarik uni u bnai hadien wa ka seiñ na Delhi kawa tip kam ka ‘Gau Gyan Foundation’ da ujor FIR ko ha Khanapara Police Station, wei i khang ya kani ka yaw ye i wow man i daw wa ku i dor i doh masi.
Da ong u leh wa neiliang ka sorkar da phah ko ya ka KHADC wa Hima Mylliem wow thooh ya i thaw wa rap heh neibynta wow pynman yaw, khnang wa ka sorkar u yoh ko u booh noh iwi i thaw wow chong ki Doctor wa ki wakreh ka chnat Veterinary waroh 24 kynta, neibhah wa ka yaw wa katni da khynnia ware ko.
Hajrong i pynbaad wa chalan tooh ya ka masi cha Bangladesh, iwa man iwi na ki daw wa ku dor i doh masi, neiliang u Montri da ong u wa ka chnat ryngkat ki pulit wa ki chipai BSF da yaklam ki dei langær wow yada na i chah chalan tooh ki masi cha Bangladesh. Da pyntip u leh wa na ka yaw ha Khanapara, ki Doctor hadien wa dep pait bniah ki ya ki masi, da e leh ki kot ki sla cha ki tre wa ki pulit heiwa da thoh ya ki thaw wow pynpoi ya ki masi.
U George da ong u wa hadooh katni ympu tipmit ya kiwa khayi wa hok, wei da kyntu u ya ka sorkar wow tipmit noh ya ki deiwa pynpsiah pyrtuid wow lait na i chim kabu wei wow yada ya i hok yong ki.
Da ong u leh wa emkaam wow pynkhlan ya ka Market Committee wei wow chna leh ya ka yaw ha Khanapara, wei wow booh ya ki Doctor ha kani ka thaw neibhah katkam wa man katni em du uwi u Doctor ka chnat Veterinary na Byrnihat.
