Ka seiñ Khooid Ya Ka Myntdu ha ka thong wow khut kyrsu kyntu ya waroh ki paidbah wa chong chnong wow man kiwa em i jooh i kitkhlieh wei kitkhia heiyatoh wow yada, u pynneh pynsah yei man kyntang man kyrpang ka wah Myntdu ha ka sngi Khyllaw 17 tarik Wisu heipor janmiet da sdang ko u pynman ya ki yalang wa kyrpang kam chibynta ka thong krehkaam namo ka Campaign yow pynsñiawthooh chaphang ka wah Myntdu.
Ya kani ka Campaign da pynman ha yungwalieh ka Panaliar heiwa ki khon ka dong ka chnong dei sñiawkhia ya ini i khut ka seiñ da wan ki wow ya embyntalang wei wow ap u sñiaw yei klam i batai chaphang ki rukom tynjooh wa ki rukom pynsihdur yei man ka wah Myntdu iwa ye u ong chisien ka sngi daw man i tynjooh wa khroo ya ka chnong ka thaw lada kam ki pateiñ kani ka juk kheiñstiñ i wow yada ya ka wah Myntdu ha kini ki por ki sngi wa katni.
U Riquoma Rq. Laloo, waheh chnong ka Panaliar kam wow kdar luti ya kani ka Campaign da e u ki kyntien pdiang burom katwa u Khroo Lamsalanki Pariat, Chairman Khooid Ya Ka Wah Myntdu kam u chongknor da e u ki kyntien yahkhmat deilang wei pynyoo ya ki dur ki dar wa wanrah yei tngit i jakhlia wa ki rukom pynsihdur wa wan ha chilynter ki bynta ka wah Myntdu katwa u Secretary ka Khooid Ya Ka Myntdu hawa kut da e u ki kyntien khublei.
Ka Rinibet Patlong hawa klam ha kani ka janmiet da khutlang ko ya ki paidbah ka chnong Jowai wow yakrehlang wa kani ka seiñ khnang wa ki pateiñ khon pateiñ ksu yong i u yoh ki u yoo u sakhi ya katæ ka wah Myntdu kawa khooid wa jngiar.
U Careme Phawa, General Secretary Panaliar hei chimbyntalang wow e i klam i kappæ, da khanna u wa ka Dorbar Chnong hei bor wa khian da yaleh ko wow yada ya ka wah Myntdu deiwa adong ya ki bru wa chong chnong wow yait nei noh taroi ya ki jhep ki jakhlia kat chawa yoh khamtam ha ki dooid ki liar kiwa noh cha ka wah Myntdu wei heijooh i por kyrsu kyntu u leh ya ki bor sorkar wow chimkhia ki u chna ya ki Sewage Treatment Plant haman ki thaw wa kut yong ki liar ki chka wa noh hei dooh i pran ka wah Myntdu neibhah kani toh man ko kawi ka laad ka luti wow ye u yada yei yohlaad ki jhep ki jakhlia wa mih na man ki dong ki chnat ka chnong Jowai u noh ha ki bynta ka wah Myntdu.
Chooh chooh ha kani ka janmiet da ioh leh u ap u sñiaw ya ki kyntien na u Ailad Suting, uwa da khana wa i rukom pynsih dur ya ka wah Myntdu em i ha ki boon rukom, iwa nyngkong i yohlaad ki jhep ki jakhlia wa mih na ki yung ki sem yong i u tooid u kai cha ka wah Myntdu, i yohlaad ki bru u chim kabu u tih moo tih chyiap neitæ i mih ki jakhlia ki jhep neidaw i leh yong ki bru wa lai baamdoh wa kiwi kiwi ki rukom leh sñiawbha hanla kattæ leh, ha lyndet kini kiyi kiyi, yow ye u pynman ya ka wah Myntdu kawa khooid wa suba wei lait nei booh hei artatien ya ka mynried yong ka iwa hakhmat dooh toh u wanrah i yei kylla hei pyrkhat pyrdaiñ yong i samen samen kam ki bru wa yoh myntoi na ka, i chimkhia neiliang ki bor sorkar wa i yakrehlang chirup wa kani ka seiñ Khooid Ya Ka Myntdu.
