U Montri Rangbha ka jylla u Conrad K Sangma ynne ka sngi da pyntip u wa ka jylla da rai ko wa ki bru wa wan na ki jylla kam ka Maharashtra, Kerala wa kiwi ki bynta ka ri neidaw wa ku kiwa yoh COVID-19, daw hap ki wow leh yaka RT-PCR Test.
“Da phah i wa ym hoi u dam ya ki wow leh RT-PCR Test wei kani ka hukum daw pynmih noh,” da ong u Conrad hawa klam hapoh ka Yung Dorbar Mang Tangka ynne ka sngi.
Kam wow pynkynmoo wa ynnin ka sngi u Prime Minister, Narendra Modi lyngba ka Video Conference da yaklam u wa ki Montri Rangbah ki jylla deiwa ban joor wow pait bniah yei lai i wan ki bru.
U Conrad da ong u wa ka jylla toh kawa syndong bha yeini wei ym em leh stiñ ko.
“I da pteiñ i wow leh ya ki Test hanla kiwa boon ki jylla da sangeh ki. I pteiñ i ya ini kamjooh i pynsñiawthooh paidbah,” da ong u Conrad.
Da kyrpaad u leh ya kiwa chong chnong ka jylla wym toh u kheiñ stiñ ki hanla da yoh dawai yada ki hanla kiwa dang em ya uni u khñiang da hiar ki.
Hawa kylli lada daw pynkrehkaam biang yaka Lockdown, u Conrad da pyntip u wa da ye wow kdoh u khoom deiwa ya krehlang ki paidbah kamjooh kiwa kreh ha ini i kaam.
“I da rap ye i wow leh rap bha bar ya kiwi ki jylla wa em haka thaaiñ. Ka Lockdown ha ini i por ym toh iwa emkaam wow leh. Tangwa lada jia wym miat i long i man, daw pyrkhat manda poi i por,” da ong u Conrad.
Katkam wa ong u, i leh Registration dang pteiñ hi i ha ka Entry Point wa em ha Umling, Ri-Bhoi iwa da yarap wow leh yei booddien heijooh i por ya kiwa wan ke chapoh ka jylla.
U Conrad da ong u wa ka Meghalaya man ko kawa da pynkhreh lada wan ka la-ær wa ar ka khlam neidaw wa da pynbiang ya iwa emkaam wow yaleh pyrchah wei ki bru leh man ki kiwa da khreh heibor pyrkhat pyrdaiñ lada nujor heipor wa nynkong.
