U Montri ka chnat bordiñ ka Meghalaya u James Sangma da pyntip u wa haka 16 tarik uni u bnai, ka North Eastern Electric Power Corporation Ltd. (NEEPCO) da phah Notice ko wa daw pynduna yei e bordiñ cha ka Meghalaya Power Distribution Corporation Ltd (MePDCL).
Kamtæ da ong u wa ka sorkar Meghalaya da kreh chitom ya ini i kaam heiwa pyn ynnin ka sngi da dep phah poisa cha ka NEEPCO, tangwa neidaw wa kiwa emkaam wa hap wow pyndep chwa, neiliang ka NEEPCO ym em ye ko wow pyndam yaka Notice.
U James da ong u leh wa sñiawthooh ki yei chemchitom ki khynnah wa pynkhreh Exam deiwa kular wow pyndooh yei pyndooh bordiñ hapoh 48 kynta
Neiliang u Montri Rangbah ka jylla, u Conrad Kongal Sangma da pyntip u wa ka sorkar da dep khut yalang ko ya ka NEEPCO heiwa da ye wow pynbait ya kiwa boon ki phang.
Da pyntip u leh wa ka i kwah yong ka NEEPCO toh wow yoh poisa lyngba ka Atmanirbhar Bharat Abhiyan, wa dang hap su da ka MeECL, tangwa da ong u wa kani ka poisa da chimpor ko kajiak neidaw wa hap wow pynbait bha chwa hapyrdi ka MeECL, ka REC wa PFS kiwa man kiwa e yaka ram.
U Conrad da pyntip u leh wa ka i yoh ya ka poisa lyngba ka ABA ha kylla iwa man i bhah wa ar man ko kamwa T. 360 klur neibynta wow su cha waroh ki Company wa saam bordiñ cha ka jylla.