U Montri ka chnat bordiñ ka Meghalaya u James Sangma da pyntip u hapoh ka yung dorbar ynnin ka sngi wa lyngba ka One Time Settlement (OTS) Scheme, ki karkhana wa em hapoh ka jylla da wan ki chakhmat wow su T. 14,46,80,863.77 hadooh ka 5 tarik uni u bnai wei hadien ini kawa dang sah ka bai bordiñ ki karkhana nadooh kiwa khian wa kiwa heh da man ko T. 31,18,89,980.31.
Iwa da dep su ki karkhana lyngba ka OTS deiwa yabhah ya i bordiñ wa pynemkaam ki man i kamni ha wah:
- Industrial Extra H/T (132 KV)- Da dep su T. 11,93,40,935.61 iwa dang sah T. 17,42,19,969.42.
- Industrial H/T (33 & 11 KV)- Da dep su T. 2,24,62,486.16 iwa dang sah T. 13,61,87,462.91
- Commercial H/T (11 KV)- Da dep su T. 17,39,626.00 iwa dang sah T. 8,78,800.00
- Industrial L/T- Da dep su T. 11,37,816 iwa dang sah T. 6,03,747.98
U James da pynche u leh wa hapoh kani ka OTS da maap 30% ka bai bordiñ lane deiwa maap yaka kuna wa slem u su bai bordiñ heiwa da jied ya kawa heh dooh.
Da pyntip u leh wa em hi ki karkhana kiwa ym pu em wow wan chakhmat wow chim kabu ya kani ka Scheme kawa daw kut haka 31 tarik uni u bnai.
Hawa jubab yeiwa kylli u MLA ka Congress u Zenith Sangma wa em ki karkhana kiwa sah da ki phaw klur tangka wym su, ya ini ym em chah ah bordiñ, katwa ki bru paidbah kiwa sah du kattu katni da chah ah ki.
U James da pyntip u wa hadien wa kut kani ka Scheme daw sdang wow ah bordiñ ya kiwa ym em su.
