U montri rangbah ka jylla, u Conrad K. Sangma ynne da chimbynta u ha ka lai kjat Dandi March na Kareli cha Gajera chirup wa ki 80 ngut ki Padyatri ha Vadodra District, Gujarat heiwa daw lai kjat u 15 Km.
Kam wow pynkynmoo heini, ha ka 12 tarik uni u bnai da kaweh ya ka lama sdang pynsahkynmoo ya ka Dandi March da u montri rangbahdooh ka jylla, u Narendra Modi na Sabarmati Ashram kam chibynta yong ka Azadi Ka Amrit Mahotsav ka wow kut ha ka 5 Naitung uni u snem.
U Conrad K. Sangma da ong u wa i lehkmen dap 75 snem wa yoh laitlooid ka ri man i leh kam chibynta wa u Mahatma Gandhi da sdang u ya ka yakhun laitlooid pyrchah ya ki pharæng.
U Conrad da lehwarom u leh ya u Gandhi ha Kareli chirup wa u montri ka sorkar jylla Gujarat u Vibhavari Dave neibhah wa ka Kareli toh kawi na ki chnong wa u Gandhi wa da sanegh u heipor wa lai u cha Dandi, heiwa ka sorkar Gujarat booh sahnaam ko ya i trep wa jooh sah u Gandi ha Kareli.
U Conrad da ong u wa kam ki nong India toh u man ki kiwa sñiaw sarong wei ymtoh u mylliñ ya ki kaam wa da leh u Gandhi ha ini i yakhun ka ri.
Da ekhublei u leh ya u montri rangbahdooh ka ri, u Narendra Modi uwa da khut ya oo wow wan cha Dandi deiwa ong leh wa u Modi da kyruiñ bha u cha ki jylla ka thaaiñ Mihsngi wow wanrah ya ki kaam pynroi.
Da ong u leh wa na ka thaaiñ em ki khlawait wa yaleh pyrchah ya ki pharæng heiwa da pyntip u chaphang U Tirot Sing, Pa Togan Sangma wa U Kiang Nangbah kiwa da yakhun na Ri-loom Khasi, Garo wa Jaiñtia.
Da khana u leh ya ka parom U Kiang Nangbah, na Ri-loom Jaiñtia Hills, uwa da chah pasi wei chwa wow chwa u chah pasi u da ong u ya ki kyntien wa lada kyruiñ i khmat cha mihsngi ka ri daw laitlooid ko wei lada kyruiñ i cha sepsngi daw chah synchaar bait ha ki pharæng wei kamtæ da laitlooid ka ri kamwa da klam u chwa wow e yei mynsien ya ka ri.
U Conrad da ong u leh wa ki paidbah ka ri India emkaam wow tip ki chaphang ki khlawait na kylleiñ ka ri.
